Qyrǵyzstanda elektr energııasy tapshylyǵyna ne sebep boldy
BІShKEK. KAZINFORM – Qyrǵyzstan prezıdenti ákimshiliginiń aqparattyq saıasat qyzmetiniń basshysy Daıyrbek Orýnbekov eldegi elektr energııasy tapshylyǵynyń sebepterin túsindirdi, dep habarlaıdy Kazinform menshikti tilshisi.
Onyń aıtýynsha, energetıka sektorynda óte ózekti máseleler bar.
- Búginge deıin Qyrǵyzstan Keńes Odaǵy kezinde, 60-70 jyl buryn salynǵan sý elektr stantsııalary esebinen kún kórip keldi. Ókinishke qaraı, táýelsizdik alǵannan keıin elde shamamen 30 jyl boıy jańa energetıkalyq nysandar salynbady. Bul rette halyq sany men elektr energııasyn tutyný kólemi turaqty túrde ósti. Jyl saıyn júzdegen jańa ǵımarat, fabrıkalar men zaýyttar salynyp jatyr, olardyń barlyǵy elektr energııasyn qajet etedi. Aqyry qazirgi ýaqytta energııa tapshylyǵy sezilip otyr, - dep atap ótti sheneýnik.
Daıyrbek Orýnbekov bul máseleniń buryn da bolǵanyn atap ótti.
- Sol kezde ol balama joldarmen sheshilmegen. Elektr energııasy kórshi elderden joǵary baǵamen satyp alynyp, halyqqa arzan baǵamen satyldy. Saldarynan memlekettiń qaryzy ósti, - dep málimdedi ol.
Qyrǵyzstan prezıdenti Sadyr Japarov 2021 jyldan bastap energetıkalyq qaýipsizdikti qamtamasyz etýge baǵyttalǵan reformalardy bastady.
- Qýaty 1860 MVt bolatyn «Qambar-Ata-1» sý elektr stantsııasynyń qurylysy bastaldy. Ol paıdalanýǵa berilgennen keıin Qyrǵyzstan elektr energııasyn eksporttaýshy elge aınalady, - dedi ol.
Sonymen qatar, búkil el boıynsha shaǵyn jáne orta sý elektr stantsııalary salynyp jatyr. 2024 jyly jalpy qýaty 48,84 MVt bolatyn segiz jańa stantsııa paıdalanýǵa berildi. Bıyl jalpy qýaty 41,29 MVt bolatyn taǵy birneshe nysan salynyp, paıdalanýǵa berýge daıyndalyp jatyr. Budan basqa, iri sý elektr stantsııalary jańǵyrtyldy, olar qazirdiń ózinde naqty nátıje berip otyr. 2030 jyldyń sońyna deıin búkil el boıynsha ondaǵan jańa iri, orta jáne shaǵyn sý elektr stantsııalaryn salý josparlanyp otyr.
- Qazirgi energııa tapshylyǵy – bizdiń shydamymyzdy synap turǵan ýaqytsha másele. Memleket ony sheshýge kúsh salyp otyr. Joǵaryda atalǵan jobalar júzege asyrylǵan saıyn elektr energııasynyń tapshylyǵy birtindep joıylyp, Qyrǵyzstan energııadan táýelsiz jáne turaqty memleketke aınalady, - dep qorytyndylady Daıyrbek Orýnbekov.
Eske sala ketsek, 2023 jylǵy 1 tamyzdan 2026 jylǵy 31 jeltoqsanǵa deıin Qyrǵyzstanda energetıka sektorynda tótenshe jaǵdaı rejımi engizildi.
2025 jyldyń qyrkúıeginde Qyrǵyzstan energetıka mınıstri Taalaıbek Ibraev aldaǵy qystyń asa kúrdeli bolatynyn eskertip, halyqty elektr energııasyn únemdeýge shaqyrdy.
Qazirgi tańda Qyrǵyzstan tutynatyn elektr energııasy óndirilgen kólemnen artyq. Tapshylyqty el kórshi memleketterden ımport arqyly jaýyp otyr.
Mınıstr turǵyndarǵa elektr energııasyn únemdeýdi, tutyný tártibin saqtaýdy, ásirese júkteme eń joǵary ýaqyttarda qýaty kóp quraldardy qoldanbaýdy eskertti.
Qyrǵyzstan prezıdenti Sadyr Japarov Energetıka mınıstrligine elektr energııasyna shekteýsiz tarıf qoldanýdy toqtatýdy tapsyrdy.
El mektepterinde energııany únemdeý sharalary engizildi./
Al Bishkekte meıramhanalar, barlar men klýbtar keshki saǵat 22:00-den keıin jabylady.