Qyrǵyzstanda el basshylarynyń bir mezgilde shetelde bolýyna tyıym salyndy
ASTANA. KAZINFORM - Qyrǵyzstanda «Memlekettik hattama týraly» jańa zań qabyldandy, dep habarlaıdy Kazinform agenttiginiń Bishkektegi menshikti tilshisi.
Qujat el basshylyǵynyń shetelge saparlaryn, joǵary jáne asa joǵary deńgeıdegi sheteldik delegatsııalardy qabyldaý tártibin, sondaı-aq ózge de hattamalyq is-sharalardy naqty retteıdi.
Zańnyń jeke babyna sáıkes, prezıdent, Jogorký Kenesh tóraǵasy jáne Mınıstrler kabınetiniń tóraǵasy bir ýaqytta shetelde bola almaıdy.
Sonymen qatar joǵary laýazymdy tulǵalardyń qysqa ýaqyt aralyǵynda bir memleketke qaıta-qaıta saparlaýyna shekteý qoıyldy. Bul talap josparly kópjaqty is-sharalarǵa qoldanylmaıdy.
Eldegi laýazymdy tulǵalardyń hattamalyq mártebe tártibin prezıdent Syrtqy ister mınıstrliginiń usynysy negizinde bekitedi.
Memlekettik hattamany júzege asyrý jumystary Syrtqy ister mınıstrligine, Prezıdent ákimshiliginiń jáne Jogorký Kenesh apparatynyń hattamalyq qyzmetterine júktelgen.
Al el aýmaǵyndaǵy biryńǵaı hattamalyq tájirıbeni úılestirýdi Syrtqy ister mınıstrliginiń Memlekettik hattama departamenti júrgizedi.
Osyǵan deıin habarlaǵanymyzdaı, Qyrǵyzstan Qyzyl kitabyn jańartady.
