Qyrǵyzstanda eki márte Keńes Odaǵynyń Batyry Talǵat Bıgeldınovty eske aldy
ASTANA. KAZINFORM — Bishkektegi Jas gvardııa býlvarynda Jeńistiń 80 jyldyǵyna oraı 1945 jylǵy Jeńis paradyna qatysqan, eki márte Keńes Odaǵynyń Batyry Talǵat Bıgeldınovtiń músinine gúl shoqtaryn qoıý rásimi ótti, dep habarlaıdy Kazinform agenttiginiń menshikti tilshisi.
Ańyzǵa aınalǵan qazaqstandyq ushqyshty jáne Uly Otan soǵysynda qaza tapqan barlyq jaýyngerlerdi eske alýǵa Qyrǵyz Respýblıkasyndaǵy qazaqtar qaýymdastyǵynyń músheleri, Qazaqstannyń Qyrǵyzstandaǵy elshiliginiń qyzmetkerleri men olardyń otbasylary qatysty.
Іs-sharaǵa qatysýshylar eske alý rásiminiń mańyzyn erekshe atap ótti. Gúl shoqtaryn qoıý — Otan úshin janyn qıǵan jaýyngerlerge degen qurmet pen taǵzym belgisi.
Aıta keteıik, Talǵat Bıgeldınovty Qyrǵyzstanmen balalyq shaǵy men jastyq kezi baılanystyrady. Ol Bishkekte 16 jasynda aeroklýbqa qabyldanǵan. 1940 jyly Qyzyl Armııa qataryna shaqyrylyp, Balashov áskerı ushqyshtar mektebine túsken. Keıin Chkalov áskerı avıatsııa ýchılışesine aýysyp, ony 1942 jyly aıaqtady.
Aǵa leıtenant Talǵat Bıgeldınovke 1944 jyldyń qazanynda maıdan men tyldaǵy erligi, jaý ushaǵyn jeke ózi atyp túsirýi jáne jaýyngerlik sheberligi úshin Keńes Odaǵynyń Batyry ataǵy berildi. Al 1945 jyldyń 27 maýsymynda Krakov, Oppeln, Katovıtse, Breslaý jáne Berlın qalalary úshin shaıqastarda qarsylas áskerleri men tehnıkasyn shabýyldaýdaǵy erligi men eskadrılıany sheber basqarǵany úshin ol ekinshi ret Keńes Odaǵynyń Batyry atandy.
Buǵan deıin Belgııada da qazaqstandyq maıdangerlerdi eske alý rásimi ótken bolatyn.
Sondaı-aq, Vashıngtonda Elba ózenindegi keńes jáne amerıkalyq áskerlerdiń kezdesýine oraı gúl shoqtary qoıyldy.