Qyrǵyzstanda egde jastaǵylar sany artyp, áleýmettik júıege júkteme kúsheıip keledi
ASTANA. KAZINFORM — 2025 jyldyń basyndaǵy derekterge sáıkes, Qyrǵyzstanda 65 jastan asqan adamdardyń úlesi 6%-ǵa (440 myń adamǵa) jetti. Bul týraly «Kabar» agenttigi málimdedi.
2024 jyldyń basynda bul kórsetkish 5,7%-dy (407,9 myń adamdy) quraǵan edi. Ulttyq statıstıka komıteti ókilderi ósimniń sebebi — 1950–1960 jyldary týǵan kóp adam zeınet jasyna jetip, eńbekke jaramsyz jastaǵy azamattardyń sany jyl saıyn artyp jatqany ekenin aıtty.
BUU klassıfıkatsııasyna sáıkes, eger 65 jastan asqan adamdar úlesi 4%-dan tómen bolsa, halyq «jas» dep sanalady. Al 4%-dan 7%-ǵa deıin bolsa, el «qartaıý sheginde» dep esepteledi. BUU boljamdaryna qaraǵanda, 2030 jylǵa qaraı Qyrǵyzstandaǵy egde jastaǵylardyń úlesi 7%-ǵa jýyqtaıdy.
2025 jylǵy 1 qyrkúıektegi jaǵdaı boıynsha eldegi zeınetkerlerdiń jalpy sany 813 538 adamǵa jetip, olardyń 642 959-y jasyna baılanysty zeınetaqy alady.
Eńbek, áleýmettik qorǵaý jáne kóshi-qon mınıstrliginiń múgedekter men egde jastaǵylarǵa qatysty sheshimder daıyndaý basqarmasynyń basshysy Nazgúl Cholýmova zańǵa sáıkes áıelder 58 jastan, al erler 63 jastan egde jastaǵy sanatqa jatatynyn eske saldy.
— Búginde 7 mıllıonnan astam halyqtyń 400 myńnan astamy 65 jasty eńsergen. BUU ólshemderi boıynsha egde jastaǵy azamattar osy sanatqa kiredi. Biraq bizdiń zańymyzda egde jastaǵy dep áıelder 58 jastan, erler 63 jastan bastap sanalady. Degenmen bul jastaǵy kóptegen adam eńbekke qabiletti. Qazirgi ýaqytta 769 myń adam Áleýmettik qor arqyly zeınetaqy alady, al shamamen 2 myń adam Eńbek mınıstrligi arqyly áleýmettik járdemaqy alyp otyr, — dedi ol.
2019 jyldan bastap egde jastaǵy azamattardyń ómir súrý sapasyn jaqsartý jospary júzege asyrylyp keledi. 2023 jyly «Qoljetimdi el» baǵdarlamasy qabyldandy. Ol múgedekterge, egde adamdarǵa jáne júkti áıelderge arnalǵan.
Eńbek mınıstrliginiń ókili eldegi ómir súrý deńgeıiniń óskenin atap ótti: er adamdardyń ortasha ómir súrý uzaqtyǵy – 66 jas, áıelderdiki – 74 jas (salystyratyn bolsaq: Japonııada – 84–86 jas).
Onyń sózinshe, 2030 jylǵa qaraı Qyrǵyzstan «qartaıyp bara jatqan elder» qataryna enedi, bul áleýmettik, medıtsınalyq jáne basqa da salalarǵa júktemeniń artýyna ákeledi. Qazirdiń ózinde elde áleýmettik qyzmetkerler jetispeýshiligi men arnaıy úı kezeginiń ulǵaıýy baıqalyp otyr.
Cholýmova egdelerge arnalǵan ortalyqtardy damytý, belsendi ári salaýatty ómir saltyn qoldaý mańyzdy ekenin, ár azamat densaýlyǵy men qarjylyq táýelsizdigine jaýapkershilikpen qarap, egde jasta otbasy men memleket úshin aýyrtpalyqqa aınalmaýy tıis ekenin aıtty.
Budan buryn Qazaqstanda 100 jastan asqan qansha qarııa bar ekenin aıtyldy.