Qyrǵyzstanda deklaratsııaǵa qatysty sheneýnikterge qoıylatyn talap kúsheıedi

ASTANA. KAZINFORM — Qyrǵyz Respýblıkasynyń Jogorký Keneshine «Múddeler qaqtyǵysy týraly» zańǵa ózgerister engizý jónindegi zań jobasy qaraýǵa usynyldy, dep jazdy 24 kg.

Qujat memlekettik jáne mýnıtsıpaldyq qyzmetshiler arasyndaǵy múddeler qaqtyǵysynyń aldyn alý jáne ony retteýge baǵyttalǵan negizgi normalardy naqtylap, keńeıtýdi kózdeıdi.

Atap aıtqanda, jańa redaktsııada «affılıırlengen tulǵa» uǵymy keńeıtilip túsindirilgen. Bul sanatqa sheshim qabyldaý protsesine tikeleı nemese janama áser ete alatyn jeke jáne zańdy tulǵalar engiziledi. Olardyń yqpaly mámileler, kompanııalardaǵy úleske ıelik etý, qarjylyq táýeldilik, baqylaý, jaqyn týystyq nemese asyraýda bolý arqyly júzege asýy múmkin.

Zań jobasynda múddeler qaqtyǵysy týraly zańnyń oryndalýyn qamtamasyz etetin ýákiletti memlekettik organdardy Mınıstrler kabıneti aıqyndaıtyny bekitiledi. Sol organdardyń biri qujattyń oryndalýyn úılestirý jáne monıtorıng jasaý fýnktsııalaryn atqarady.

Sonymen qatar, jeke (jekeshe) múddeler týraly deklaratsııalardy tekserý tártibine qatysty birqatar ózgerister engiziledi.

Jobaǵa sáıkes, mundaı deklaratsııalardy tekserýdi tıisti memlekettik organdardyń, jergilikti ózin-ózi basqarý organdarynyń, mekemeler men uıymdardyń kadr qyzmetteri júzege asyratyn bolady.

Budan bólek, qujat zań buzýshylyqtar úshin jaýapkershilikti kúsheıtýdi kózdeıdi. 28-baptyń jańa redaktsııasyna sáıkes, deklaratsııalarda jalǵan málimet kórsetý tártiptik jaýapkershilikke ákeledi, al basshy tarapynan múddeler qaqtyǵysy anyqtalǵan jaǵdaıda tıisti sharalardyń qabyldanbaýy onyń qyzmetten bosatylýyna negiz bolýy múmkin.

Zań talaptaryn buza otyryp alynǵan tabystar men múliktik paıda memleketke keltirilgen zalal retinde qarastyrylyp, olardy mindetti túrde óteý talap etiledi.

Eske sala keteıik, buǵan deıin Qyrǵyzstan bacshysy saılaýǵa qatyspaǵandarǵa aıyppul salýdy usyndy.