Qyrǵyzstanda daýys berýshilerge para bergen partııa ókilderi ustaldy

ASTANA.KAZINFORM — Qyrǵyzstanda «Sotsıal-demokrattar» partııasynyń ókilderine jergilikti kenesh depýtattaryn saılaý kezinde saılaýshylarǵa para berdi degen aıyp taǵylyp, olardy tintý jáne ustaý jumystary júrgizildi, dep habarlaıdy Kazinform-nyń menshikti tilshisi. 

Bishkek ІІB málimetinshe 13 qarashada qyrǵyzstandyq áleýmettik jelilerde sotsıal-demokrattar partııasy shtabynyń bastyǵy Irına Karamýshkınanyń sol partııadan Bishkek qalalyq kenesh depýtattyǵyna kandıdat Danııar Sholponbaevpen áńgimelesýiniń aýdıojazbasy tarady, onda olar aldaǵy 17 qarashada jergilikti keneshterge depýtattardy saılaýda saılaýshylardyń daýystaryn satyp alýdy talqylaǵan. 

Bishkek ІІB tergeý qyzmeti QK 196-baby «saılaýshylardyń daýysyn satyp alý» faktisi boıynsha qylmystyq is qozǵady. Qazirgi ýaqytta qylmystyq is boıynsha qajetti tergeý sharalary júrgizilip jatyr.

Aıta keteıik, 2024 jyldyń 17 qarashasynda Qyrǵyzstanda jergilikti keneshterdiń, sondaı-aq Bishkek jáne Osh qalalarynyń depýtattaryn saılaý ótedi. Aldaǵy saılaýǵa baılanysty Qyrǵyzstan prezıdenti Sadyr Japarov el halqyna úndeý jasady.

Buǵan deıin Qyrǵyzstan mınıstrler kabıneti tóraǵasynyń orynbasary — QR UQK basshysy Qamshybek Táshıev jergilikti keneshter depýtattyǵyna úmitkerlerdiń árqaısysynyń krımınal men sybaılas jemqorlyqqa qatysy bar-joǵyn muqııat tekserýdi tapsyrǵan bolatyn.

18 qazannan bastap jergilikti keneshterge depýtattardy saılaý jónindegi úgit-nasıhat kezeńi bastaldy.