Qyrǵyzstanda búırek aýystyrý otalary tegin jasalady

QYRǴYZSTAN. KAZINFORM - Qyrǵyzstanda búırek transplantatsııalaý otalary tegin jasalady, dep habarlaıdy eldiń Kabar aqparat agenttigi.

Qyrǵyzstan Respýblıkasynyń Prezıdenti Sadyr Japarovtyń agenttikke bergen suhbatynda aıtqanyndaı, qazir elde 2,5 myńnan astam azamat gemodıalız alýda, onyń 50-i donor taýyp, tolyq medıtsınalyq tekserýden ótip, transplantatsııaǵa daıyndalýda.

«Mundaı alǵashqy ota sátti ótti. Eki medıtsınalyq brıgada kúnine 2-3 ota jasaı alady. Alla qalasa, budan bylaı ózimiz ota jasaıtyn bolamyz. Quny 7-8 myń dollar gemodıalızge túsetin naýqastardyń búıregin aýystyrý otasyn memleket óteıdi», - dedi ol.

Sadyr Japarov memleket osylaısha eki jerden utady. Birinshisi – Qyrǵyzstan azamattaryna kómek. Ekinshisi – shyǵyndardy únemdeý.

«Memleket jyl saıyn gemodıalız alatyn árbir patsıentke 14-15 myń dollar jumsaıdy. Jyl saıyn 2,5 myń adamǵa 3 mlrd-tan astam som bólinedi. Donor tapqan naýqastarǵa ózimiz ota jasasaq, shyǵyndy azaıta alamyz. Naýqas donordy ózi tabady, eń bastysy – genetıkalyq uqsastyq bolýy kerek. Gemodıalız alatyn bir naýqasqa jyl saıyn jumsalatyn qarajattyń jartysyna ota jasaý arqyly biz qalǵanyn únemdep, kelesi jyldyń shyǵynyn tolyqtaı azaıta alamyz. Óıtkeni, eger naýqas gemodıalız alýdy toqtatsa, memleket shyǵyny da azaıady», - dep túsindirdi Qyrǵyzstan basshysy.

Buǵan deıin habarlanǵandaı, Bishkekte Ana men bala ulttyq ortalyǵynyń transplantologııa bólimshesi 22 jastaǵy naýqasqa alǵash ret tegin búırek almastyrý operatsııasyn jasady.