Qyrǵyzstanda býdda ǵıbadathanasynyń kesheni tabyldy
ASTANA. KAZINFORM – Qyrǵyzstandaǵy Aq-Beshim (Sýıab) qalashyǵynda býdda ǵıbadathanasynyń kesheni tabyldy, dep habarlaıdy Kabar.
Qyrǵyzstannyń Shý oblysyndaǵy ortaǵasyrlyq Aq-Beshim (Sýıab) qalashyǵy aýmaǵynda qyrǵyz-japon arheologııalyq ekspedıtsııasy býddalyq dástúrge jatýy múmkin, VII–VIII ǵasyrlarǵa tıesili ǵıbadathana kesheniniń qaldyqtaryn anyqtady. Bul týraly Qyrǵyz Respýblıkasynyń Mádenıet mınıstrligi habarlady.
Zertteý jumystary 2026 jyldyń mamyr aıynyń basynan beri Shahrıstan-2 ýchaskesinde júrgizilip jatyr. Qazba barysynda ǵalymdar kúıdirilgen kirpishten salynǵan baspaldaqtar, pandýs jáne platforma tapqan. Mundaı sáýlettik elementter Tan dáýirindegi ǵıbadathana qurylystaryna tán ekeni atap ótildi. Tabylǵan nysandar belgili arheolog Alekseı Bernshtamnyń 1940-jyldardyń sońynda osy aýmaqta býddalyq ǵıbadathana kesheni bolǵany týraly boljamyn rastady.
2025–2026 jyldardaǵy qazba jumystary ejelgi Sýıab qalasynda býddalyq mádenıettiń taralýy týraly jańa ǵylymı derekter usyndy. Sýıab VI–XI ǵasyrlarda Batys Túrik qaǵanatynyń astanasy bolǵan jáne Uly Jibek jolynyń mańyzdy ortalyqtarynyń biri sanalǵan.
Ekspedıtsııa 2012 jyldan beri jumys istep keledi. Qyrǵyzstan tarapynan ony Ulttyq ǵylym akademııasynyń professory Baqyt Amanbaeva, al japon tarapynan Teıke ýnıversıtetiniń professory Kadzýıa ıAmaýtı basqarady.
Qazirgi ýaqytta bul aýmaqqa tarıhı-mádenı nysan mártebesin qaıtarý jumystary júrgizilip jatyr. Eger oń sheshim qabyldansa, bolashaqta ashyq aspan astyndaǵy mýzeı qurý josparlanǵan.
Aıta keteıik, 2014 jyly Aq-Beshim (Sýıab) qalashyǵy «Jibek joly: Chanan — Tıan-Shan dáliziniń marshrýttar jelisi» atty transulttyq nomınatsııa aıasynda ıÝNESKO-nyń Búkilálemdik muralar tizimine engizilgen.
Aıta ketelik BQO-da Altyn Orda dáýirine jatatyn arheologııalyq nysandar tabylǵan edi.
