Qyrǵyzstanda Bishkek vıtse-meri Jamalbek Yrsalıev qamaýǵa alyndy
ASTANA. KAZINFORM — Bir kún buryn el astanasyndaǵy «Týngých» shaǵyn aýdanynda turǵyndarmen kezdesý kezinde Bishkek qalasynyń vıtse-meri Jamalbek Yrsalıev ustaldy, dep habarlaıdy KABAR.
Qyrǵyz Respýblıkasynyń Ulttyq qaýipsizdik jónindegi memlekettik komıteti onyń qalaı ustalǵanyn aıtty.
Ulttyq qaýipsizdik komıtetiniń málimetinshe, Bishkek ákiminiń orynbasary Jamalbek Yrsalıev qyzmettik jaǵdaıyn asyra paıdalanyp, aýdany 1500 sharshy metrge jýyq kommýnaldyq jer ýchaskesin ýákiletti memlekettik organdardyń ruqsatynsyz zańsyz alǵany jáne paıdalanǵany anyqtalǵan.
«Týngých» yqsham aýdanyndaǵy № 36 turǵyn úıge irgeles ornalasqan 4 jeńil kommertsııalyq nysan men 5 balalar attraktsıony 6 jylǵa jýyq ýaqyt ishinde ornatylyp, jumys istep turǵany atalyp ótti.
Atalǵan fakti boıynsha, Jamalbek Yrsalıevtiń 2020 jyldan beri Bishkek qalasynyń vıtse-meri (qazirgi ýaqytta Bishkek qalasy ákiminiń orynbasary) qyzmetin atqara otyryp, joǵaryda atalǵan kommertsııalyq nysandardy zańsyz ornatyp, olarǵa qamqorlyq jasap, Bishkek qalasy ákimdiginiń ýákiletti organdarynyń ruqsatynsyz jumys istep, sonyń saldarynan jergilikti bıýdjetke jalǵa alý tóleminen aıtarlyqtaı zııan keltirgeni anyqtaldy.
Ákimdik qyzmetkeriniń bul áreketi «Týngých» shaǵyn aýdany turǵyndarynyń narazylyǵyn týdyrǵany, sondaı-aq Bishkek qalasy Oktıabr aýdanynyń mýnıtsıpaldy ákimshiliginiń saıabaq pen balalar oıyn alańyn salý jobasyn júzege asyrýǵa kedergi keltirgeni kórsetilgen. Qazirgi ýaqytta zańsyz jumys istep turǵan nysandar bólshektelip, balalar oıyn alańynyń qurylysy bastaldy.
Qabyldanǵan sharalardyń nátıjesinde atalǵan ýchaskeni jalǵa berýden alynǵan 2 mln 979 myń 889 som kólemindegi shyǵynnyń orny toltyryldy.
16 shilde kúni Jamalbek Yrsalıev jáne V.N.A. esimdi azamat ustalyp, Qyrǵyz Respýblıkasy Ulttyq qaýipsizdik memlekettik komıtetiniń ýaqytsha ustaý ızolıatoryna qamaldy.
Qazirgi ýaqytta tergeý amaldary júrgizilip jatyr.
Buǵan deıin Qyrǵyzstan azamaty tyıym salynǵan dinı kitaptardy ákelgeni úshin aıyppul tólegeni habarlandy.