Qyrǵyzstanda «Bishkek-Arena» qurylysyna qansha qarjy jumsaldy
ASTANA. KAZINFORM — Qyrǵyzstan astanasynda boı kótergen «Bishkek-Arena» stadıonynyń qurylysyna 386 mln dollar jumsalǵan. Bul týraly Qyrǵyz Respýblıkasy prezıdentiniń baspasóz hatshysy Askat Alagózov áleýmettik jelidegi paraqshasynda jazdy, dep habarlaıdy Kazinform agenttiginiń Bishkektegi menshikti tilshisi.
Onyń aıtýynsha, bastapqyda 30-35 myń kórermenge arnalǵan, quny shamamen 60-70 mln dollar bolatyn stadıon salý josparlanǵan edi. Keıin Qyrǵyzstan prezıdenti Sadyr Japarov jobany tolyǵymen ózgertýdi tapsyrǵan. Stadıonnyń syıymdylyǵy 51 252 orynǵa deıin ulǵaıtylyp, nysan FIFA-nyń álemdik standarttaryna sáıkes keletindeı qaıta jobalandy. Nátıjesinde, dástúrli qyrǵyz kıiz úıi pishininde boı kótergen segiz qabatty sáýlet týyndysynyń dıametri 280 metrge, al bıiktigi 70 metrge jetti.
Stadıonnyń memlekettik bıýdjetke salmaq salmaı, óz shyǵynyn ózi óteýi úshin munda jalpy aýmaǵy shamamen 36 myń sharshy metr bolatyn aýqymdy ınfraqurylym jasaqtalǵan.
Oǵan mynalar kiredi:
• 23 meıramhana jáne 11 dámhana;
• Saýda ortalyǵy, sýpermarket, 48 dúken jáne 18 saýda dúńgirshegi;
• 4 kınoteatr zaly, sportzal, balalar oıyn alańy jáne terrasalar.
Buǵan deıin áleýmettik jelilerde nysannyń quny shamamen 60 mln dollar boldy degen aqparat taraǵan edi. Alaıda bılik bul málimetti joqqa shyǵaryp, shyndyqqa janaspaıtynyn málimdedi.
Eske sala keteıik, 31 tamyzda Qyrǵyzstan astanasyndaǵy jańa «Bishkek Arena» stadıonynda VI Dúnıejúzilik kóshpendiler oıyndarynyń saltanatty ashylý rásimi ótti.
Sondaı-aq tanymal kolýmbııalyq ánshi Shakıranyń Qyrǵyzstandaǵy «Bishkek-Arena» stadıonynda kontsert berýi josparlanyp otyrǵany habarlandy.
Qazaqstan Kóshpendiler oıyndarynda 32 altyn medal enshilep, jalpykomandalyq esepte top jardy.
Memleket basshysy Qasym-Jomart Toqaev Qazaqstan ulttyq quramasyn VI Dúnıejúzilik kóshpendiler oıyndarynda tabysty óner kórsetýimen quttyqtady.
Endi 2028 jylǵy Dúnıejúzilik kóshpendiler oıyndary Tatarstanda ótetin boldy.
