Qyrǵyzstanda biryńǵaı tólqujat engiziledi: endi kez kelgen qurylys nysanyn QR kod arqyly tekserýge bolady

ASTANA.KAZINFORM — Qyrǵyzstanda qurylys ındýstrııasyn tsıfrlandyrýdyń jańa kezeńi bastaldy: qurylys nysandarynyń biryńǵaı aqparattyq tólqujatyn engizý, ol eldegi barlyq qurylys nysanynda mindetti sanalady, dep habarlaıdy Kabar agenttigi. 

Qyrǵyz Respýblıkasynyń Qurylys, sáýlet jáne turǵyn úı-kommýnaldyq sharýashylyq mınıstri Nurdan Oryntaevtyń aıtýynsha, tólqujattardy engizý osy jyldyń basynda QR kodtary engizilgennen keıin saladaǵy tsıfrlandyrýdyń ekinshi kezeńi bolyp sanalady.

— Biz QR kodtaryn jyl basynda engizgenbiz, biraq zań boıynsha árbir qurylys kompanııasy óz ornynda tólqujat ornalastyrýǵa mindetti. Sondyqtan QR kodtaryn engizgennen keıin biz ekinshi kezeńge — biryńǵaı tólqujatty engizýge kóshtik. Bul qujat qurylys jobasy týraly barlyq aqparatty qamtıdy: qurylystyń bastalýy, ázirleýshi​​​​, jumys kezeńi, josparlanǵan aıaqtalý merzimi jáne tartylǵan jobalaý uıymy. Pasportta sonymen qatar mınıstrliktiń saıtyna kirip, qurylystyń zańdy nemese zańsyz ekenin tekserýge bolatyn QR kody bar, — dedi Oryntaev.

Mınıstr kópqabatty turǵyn úıden bastap áleýmettik mekemelerge deıingi barlyq joba úshin biryńǵaı tólqujat mindetti ekenin atap ótti. Bul baspana satyp alatyn azamattarǵa qurylystyń zańdylyǵyna senimdi bolýǵa múmkindik beredi.

Tólqujatqa mynalar kiredi:

Qurylys mınıstrliginiń resmı logotıpi;

múliktiń ataýy men mekenjaıy;

qurylys kompanııasy týraly málimet;

jaýapty mamandardyń derektemeleri jáne olardyń baılanys derekteri;

ruqsat nómirleri;

qurylystyń bastalý jáne aıaqtalý merzimi;

qosymsha aqparatqa onlaın qol jetkizýge arnalǵan QR kody.

Mınıstr túsindirgendeı, biryńǵaı tólqujatty engizý ashyqtyqty arttyrýǵa, memlekettik baqylaýdy kúsheıtýge, turǵyn úı satyp alý kezinde azamattardyń quqyqtaryn qorǵaýǵa baǵyttalǵan. 

Aıta ketelik Eýroodaq Qyrǵyzstanǵa «Qambar-Ata-1 sý elektr stantsııasynyń» qurylysyna 1 mlrd dollar bóledi.