Qyrǵyzstanda biryńǵaı QR-tólem júıesi boıynsha rekord jańaryp keledi
ALMATY. KAZINFORM — Qyrǵyz Respýblıkasy Ulttyq banki tóraǵasy Melıs Týrgýnbaev onlaın tólemderdiń ósýi týraly pikir bildirdi.
Almatyda ótken Qazaqstan qarjygerleriniń XIII kongresinde Melıs Týrgýnbaev qazaqstandyq áriptesterin biryńǵaı bankaralyq QR-tólem júıesiniń resmı iske qosylýymen quttyqtady.
— Bul kezeńdi biz 2019 jyly ótkenbiz. Sol kezde qolma-qol aqshasyz tólemderdi damytý qajet ekenin jáne óńirlerimizdiń artta qalǵanyn túsindik. Biz QR-tólem júıesin belsendi túrde damytýǵa kiristik. Atap aıtqanda, tólem júıeleriniń barlyq qatysýshylaryn ulttyq standartqa qostyq. Jyl ótken saıyn kórsetkishter rekord jańartyp keledi. Biz ne istedik? Júıeni iske qosyp, komıssııany alyp tastadyq — sodan keıin bári paıdalana bastady. Sebebi QR arqyly barlyq tólemder men tranzaktsııalar tegin boldy. Keıin memlekettik qyzmetterdi, memlekettik servısterdi QR-tólemge qostyq. Bul da ósimge ákeldi, — dedi ol.
Ulttyq bank tóraǵasy óńirde Qyrǵyzstannyń QR-tólem júıesi men krıptoaktıvterdi damytý boıynsha alda kele jatqanyn atap ótti.
— Tsıfrlyq aqsha boıynsha sál artta qalýymyz múmkin, biraq sońǵy orynda bolmas úshin jyldam engizýge tyrysyp jatyrmyz. Eger Qazaqstan pılottyq jobany bastap ketse, biz kelesi jyly bastaımyz. Qazir testileý kezeńinen ótip jatyr: tsıfrlyq som engizetin kompanııany tańdadyq, blokcheın júıesin anyqtadyq. Zańnamalyq bóligi daıyn: 10-nan astam zań men normatıvtik aktilerge ózgerister engizildi. Kelesi jyldyń basynda pılottyq jobany bastaımyz jáne barlyq memlekettik qyzmetterdi de tsıfrlyq somǵa kóshirýdi josparlap otyrmyz. Jappaı paıdalanýdy 2027 jyldyń qańtarynda bastaımyz, sol ýaqytqa deıin bári daıyn bolady, — dedi ol.
Qyrǵyz Respýblıkasynda QR-tólem júıesi 2022 jyldyń mamyrynan beri jumys isteıdi. Júıege qatysýshylar qosylǵannan keıin QR-tólemderdiń sany 54,6 ese, tólem kólemi 85 esege jýyq ósken.
24.kg málimetinshe, tek 2025 jyldyń 6 aıynda QR arqyly 274,9 mlrd somǵa tólem júrgizilgen — bul 2024 jyldyń dál osy kezeńimen salystyrǵanda shamamen 20 ese kóp.
Eske salaıyq, keshe elimizde biryńǵaı bankaralyq QR-tólem júıesi resmı túrde iske qosyldy.