Qyrǵyzstanda bir jynysty nekege tyıym salynýy múmkin
ASTANA. KAZINFORM — Qyrǵyzstanda bir jynysty nekege turýǵa jáne azamattardyń resmı qujattardaǵy jynysy týraly málimetti ózgertýine tyıym salýdy kózdeıtin zań jobasy qaralyp jatyr, dep jazdy Kazinform agenttiginiń Bishkektegi menshikti tilshisi.
Tıisti zań jobasyn Qyrǵyzstan parlamenti – Jogorký Kenesh birinshi oqylymda maquldady.
Zań jobasyna sáıkes, týý týraly kýálikte, tólqujatta jáne azamattyq hal aktilerin tirkeý organdary (AHAT) beretin ózge de resmı qujattarda kórsetilgen «jynys» deregin ózgertýge tolyq tyıym salynady.
Qujatta adamnyń jynysy zań júzinde tek týǵan kezde anyqtalǵan bıologııalyq jynys retinde tanylady. Sondaı-aq jynysty ózgertýge baǵyttalǵan hırýrgııalyq operatsııalar, gormondyq terapııa jáne basqa da medıtsınalyq aralasýlarǵa tyıym salý usynylyp otyr.
Zań jobasy boıynsha týý kezinde memlekettik tirkeý barysynda engizilgen jynys týraly jazba túpkilikti bolyp esepteledi jáne ony azamat kámelet jasyna tolǵannan keıin de, óziniń ótinishimen de, sot sheshimimen de, medıtsınalyq nemese ózge qorytyndylar negizinde de ózgerte almaıdy.
Tek AHAT qyzmetkeri jibergen tehnıkalyq qatelerdi (qate jazý nemese baspa qatesi) túzetýge ǵana ruqsat beriledi.
Sonymen qatar zańnamalyq túzetýler bir bıologııalyq jynystaǵy adamdardyń nekege turýyna tyıym salýdy qarastyrady. Balaǵa ana retinde tek áıel jynysty tulǵa, al áke retinde er jynysty tulǵa ǵana tanylmaq.
Sondaı-aq ata-analar balany onyń bıologııalyq jynysyna sáıkes tárbıeleýge jáne onyń fızıkalyq ári psıhıkalyq densaýlyǵyn qorǵaýǵa, sonyń ishinde jynysty ózgertýge baǵyttalǵan yqtımal aralasýlardan saqtaýǵa mindetti bolady.
Aıta keteıik, buǵan deıin Qyrǵyzstanda transgender adamdardy medıtsınalyq kýálandyrý tártibine qatysty ereje ázirlengeni habarlanǵan edi.
Qyrǵyzstanda qoǵamdyq oryndardaǵy ádepsiz qylyqtar úshin jaza kúsheıtilmek.
