Qyrǵyzstanda bir aptada júrgizýshi kýáligin aýystyrýǵa 79 myńǵa jýyq ótinim tústi

ASTANA. KAZINFORM — Qyrǵyz Respýblıkasynda júrgizýshi kýálikterin aýystyrýǵa suranys artty, dep habarlaıdy Kabar.

Prezıdent isterin basqarýshy Kanybek Týmanbaev «Ýnaa» memlekettik mekemesinde jospardan tys tekserý júrgizip, mekemeniń qyzmetimen tanysty.

Vedomstvonyń baspasóz qyzmetiniń málimetinshe, tekserý barysynda avtokólik quraldaryn tirkeý jáne qaıta tirkeý, júrgizýshi kýálikterin berý jáne aýystyrý protsesteri, azamattarǵa qyzmet kórsetý uıymy, sondaı-aq qaýipsizdik talaptarynyń saqtalýy baqylaýǵa alyndy.

Týmanbaev eski merzimsiz júrgizýshi kýálikterinde azamattardyń 20–30 jyl burynǵy fotosýretteri qoldanylatynyn atap ótti, bul jeke tulǵany naqty sáıkestendirýdi qıyndatady.

Sonymen qatar, mundaı qujattarda qorǵanysh elementteri jetkiliksiz jáne olardy qoldan jasaý ońaı, bul qaýipsizdikke tikeleı qater tóndiredi. 

Sondaı-aq eski úlgidegi júrgizýshi kýálikteri shetelde zańdy qujat retinde tanylmaıdy, ıaǵnı halyqaralyq deńgeıde legalızatsııalanbaǵan.

Osyǵan baılanysty memlekette qatań tártip saqtalýy tıis ekeni, al qujattar zamanaýı talaptarǵa saı bolýy qajet ekeni atap ótildi.

Prezıdent isterin basqarýshy júrgizýshi kýálikterin berý jáne avtokólikti tirkeý salasynda tsıfrlandyrýdy damytý, tsıfrlyq servısterdi keńeıtý jáne derekterdi tolyq jańartý jóninde tapsyrma berdi.

Vedomstvonyń habarlaýynsha, merzimsiz júrgizýshi kýálikterin aýystyrý aıasynda 2026 jylǵy 15–21 qańtar aralyǵynda onlaın formatta — 46 431 ótinim, oflaın formatta — 32 528 ótinim qabyldanǵan.

Jalpy sany — 78 959 ótinim. Bul azamattardyń bul máselege joǵary qyzyǵýshylyq tanytyp otyrǵanyn jáne kórsetiletin qyzmetterge suranystyń edáýir ekenin kórsetedi.

Osyǵan deıin Qyrǵyzstanda júrgizýshi kýáligine emtıhandy JI qabyldaıtynyn jazǵan edik.