Qyrǵyzstanda bılikti basyp alý úshin shtab qurmaqshy bolǵan Imamıdın Tashov ustaldy
ASTANA. KAZINFORM — Bılikti kúshpen basyp almaq boldy degen kúdikpen izdeýde júrgen Imamıdın Tashov Shý oblysy Qaıyńdy aýylynda ustaldy. Bul týraly Ulttyq qaýipsizdik komıtetiniń baspasóz ortalyǵy habarlady, dep jazady 24 kg.
UQK habarlaýynsha, Imamıdın Tashov qyrǵyz-qazaq shekarasyn zańsyz kesip ótken. Ol Almatydan Qara-Baltaǵa kele jatqan jerinde ustaldy.
«Qara-Baltada ol bılikti basyp alý maqsatyndaǵy narazylyq aktsııasyn ótkizýge kúsh biriktiretin ýaqytsha shtab uıymdastyrýdy josparlaǵan. Imamıdın Tashov izdeýde júrgende áleýmettik jeliler arqyly jumysqa qabyldaý jumystaryn júrgizgen. Qazirgi ýaqytta tergeý amaldary júrgizilip jatyr», - delingen habarlamada.
«KG Group» qurylys kompanııasynyń basshysy Imamıdın Tashovqa qatysty qylmystyq is qozǵaldy. Ol bılikti kúshpen basyp almaq boldy degen kúdikke ilindi. Buǵan deıin oǵan izdeý jarııalanǵan bolatyn. Bul iske belsendilik tanytqan Tilekmat Kúrenov te aıyptalyp otyr.
Buǵan deıin Ulttyq qaýipsizdik komıteti KG Group kompanııasy Bishkekte alty kóppáterli turǵyn úı salǵanyn habarlaǵan. Biraq bul nysandardyń eshqaısysy ruqsatsyz salynǵan qurylys nysandary bolǵandyqtan paıdalanýǵa berilgen joq.
Buǵan deıin áleýmettik jelilerde Imamıdın Tashovtyń «bandıt sııaqty urlanǵanyn», tutqynda bolǵanyn aıtyp, memleket kirisine aýdarylǵan 52 mıllıon somnan bólek, taǵy 100 mıllıon som talap etkenin aıtqan vıdeosy jarııalanǵan bolatyn.
