Qyrǵyzstanda bazalyq mólsherleme 11 paıyzǵa deıin tómendetildi
BІShKEK. KAZINFORM – Qyrǵyz Respýblıkasynyń Ulttyq banki bazalyq mólsherlemeni 11%-ǵa deıin tómendetti. Sheshim 2024 jyldyń 30 sáýirinen bastap kúshine enedi, dep habarlaıdy Qyrǵyz Respýblıkasynyń Ulttyq banki.
Retteýshiniń málimetinshe, Qyrǵyz Respýblıkasyndaǵy ınflıatsııalyq protsester álsireýin jalǵastyrýda. Jyldyq ınflıatsııa kórsetkishi 2024 jylǵy sáýirde 5,2%-dy qurap, 2023 jylǵy jeltoqsandaǵy kórsetkishten 7,3 paıyzǵa tómendegen jáne aqsha-nesıe saıasatynyń orta merzimdi maqsatty 5-7%-ǵa jaqyn.
Inflıatsııa qurylymynda azyq-túlik taýarlary toby boıynsha baǵa ósiminiń aıqyn baıaýlaýy baıqalady (2023 jylǵy jeltoqsandaǵy 3,4%-dan 2024 jylǵy sáýirdegi 1,1%-ǵa deıin), buǵan álemdik azyq-túlik naryqtaryndaǵy baǵanyń tómendeýi de áser etti. Azyq-túlik emes taýarlar men qyzmetter baǵasy ósý qarqyny birshama tejelgen dınamıkamen tómendeýde.
Elde ekonomıkalyq belsendilik joǵary. 2024 jylǵy qańtar-naýryzda naqty JІÓ ósimi 8,8%-dy qurady. Burynǵydaı ekonomıkanyń ósýine negizgi úles qyzmet kórsetý salasy, qurylys jáne óńdeý ónerkásibinen keledi. Іshki tutyný deńgeıiniń joǵarylaýy saqtalyp otyr.
«Eldiń bank sektory turaqty jáne negizgi kórsetkishter boıynsha ósim kórsetip otyr. Jalpy, kommertsııalyq bankterdiń ótimdiligi jetkilikti, bul elimizdiń naqty sektoryn odan ári nesıeleýge negiz jasaıdy. Aqsha naryǵynda Ulttyq Bank belgilegen paıyzdyq mólsherleme dálizi sheńberinde qysqa merzimdi paıyzdyq mólsherlemelerdi qalyptastyrý jalǵasýda. Іshki valıýta naryǵy turaqty», - delingen Qyrǵyz Respýblıkasynyń Ulttyq bankiniń habarlamasynda.
