Qyrǵyzstanda balyqty tormen zańsyz aýlaǵandarǵa jazany kúsheıtý usynyldy
ASTANA. KAZINFORM — Qyrǵyzstan Jogorký Keneshiniń tóraǵasy Marlen Mamatalıev Túp jáne Ystyqkól aýdandaryna baryp, Ystyqkól kóliniń túbi men jaǵalaýyn tazartý ekologııalyq aktsııasyna qatysty. Bul týraly parlamenttiń baspasóz qyzmeti habarlady, dep jazady Kabar.
Aldymen spıker Jogorký Kenesh depýtattarymen, Sholpan-Ata qalalyq keńeshiniń depýtattarymen jáne jastarmen birge kól jaǵalaýyn tazalaý jumystaryna qatysty. Keıin aktsııaǵa qatysýshylar sýǵa súńgip, flora men faýnaǵa qaýip tóndiretin qaldyqtardy kól túbinen shyǵardy.
Marlen Mamatalıev Ystyqkóldiń biregeı tabıǵı mura ekenin erekshe atap ótti.
— Ókinishke qaraı, sońǵy ýaqytta kól jaǵasynda ǵana emes, túbinde de qoqys kóbeıip ketti. Ásirese zańsyz qoıylǵan sıntetıkalyq balyq aýlaý torlary ekojúıege úlken zııan keltirip otyr. Bul syrt kózge baıqalmaǵanymen, bıologııalyq ártúrliliktiń azaıýyna, balyqtardyń qyrylýyna jáne ekologııalyq tepe-teńdiktiń buzylýyna ákeledi. Búgin biz buǵan óz kózimizben kýá bolyp, kóp mólsherde qoqys pen sıntetıkalyq torlardy shyǵardyq, — dedi ol.
Sondaı-aq tóraǵa memleket basshysy bul máselege sońǵy úsh jyl boıy erekshe kóńil bólip kele jatqanyn aıtyp, tıisti jarlyqqa qol qoıylǵanyn jetkizdi.
— Prezıdent Ystyqkólge uqypty qaraýǵa únemi shaqyryp keledi. Jaǵdaı shynymen de alańdatarlyq. Kól túbinen shamamen 6 myń shaqyrym brakonerlik tor shyǵaryldy. Bul Qarakól qalasyna deıingi araqashyqtyqty 15 ret júrip ótýmen teń. Ókinishke qaraı, mundaı zańsyz áreketter áli de jalǵasýda. Osyǵan baılanysty biz balyqty tormen zańsyz aýlaǵany úshin jaýapkershilikti kúsheıtýdi kózdeıtin zań jobasyn qoǵamdyq talqylaýǵa shyǵaryp otyrmyz. Zań qabyldansa, aıyppul kólemi ulǵaıtylyp, zańsyz tor qurǵandar túrmege de qamalýy múmkin, — dedi Mamatalıev.
Sonymen qatar ol bul aktsııanyń ekologııalyq máselelerdiń aldyn alýǵa baǵyttalǵanyn aıtyp, azamattardy tabıǵatqa janashyrlyqpen qaraýǵa shaqyrdy.
— Ystyqkóldiń tazalyǵyn saqtap, ony keler urpaqqa jetkizý — bárimizdiń ortaq mindetimiz. Óz jeri men halqyn súıetin adam mundaı áreketterge jol bermeýi tıis, — dedi ol.
Marlen Mamatalıev bastaǵan depýtattar bastamashy bolǵan «Qyrǵyz Respýblıkasynyń sý nysandaryn qorǵaýdy kúsheıtý máseleleri boıynsha keıbir zańnamalyq aktilerge ózgerister engizý týraly» zań jobasy búgin qoǵamdyq talqylaýǵa shyǵarylǵany habarlandy.
Budan buryn Qyrǵyzstan shekaradaǵy veterınarııalyq baqylaýdy retteıtinin jazdyq.
