Qyrǵyzstanda balamaly áskerı qyzmetke tólenetin jarna mólsheri kóbeıýi múmkin
ASTANA. KAZINFORM — Qyrǵyzstan Qorǵanys mınıstrligi áskerı jáne balamaly qyzmetti retteıtin zańnamaǵa ózgerister engizý týraly zań jobasyn kópshilik talqylaýyna shyǵardy, dep habarlaıdy Kabar.
Zań jobasynyń maqsaty — balamaly áskerı qyzmet pen mobılızatsııalyq daıyndyqqa qatysty tólemderdiń mólsherin qaıta qaraý jáne ony qazirgi ekonomıkalyq ósim, ınflıatsııa men statıstıkalyq derekterge saı jańartý.
Joba sheńberinde merzimdi áskerı qyzmetti balamaly qyzmetpen almastyrǵany nemese mobılızatsııalyq jıyndardan ótkeni úshin tólenetin tólemderge negiz bolatyn eseptik kórsetkishterdi arttyrý usynylǵan.
Jańa tólem mólsherleri:
-
Otbasylyq jaǵdaıyna baılanysty bosatylǵandar úshin – 18 000 somnan 25 000 somǵa deıin;
-
Densaýlyq jaǵdaıyna baılanysty bosatylǵandar úshin – 25 000 somnan 40 000 somǵa deıin;
-
Dinı uıym músheleri jáne qoǵamdyq jumys atqarǵysy keletinder úshin – 25 000 somnan 50 000 somǵa deıin;
-
22-40 jas aralyǵyndaǵy mobılızatsııalyq jıynnan ótýdi qalaıtyndar úshin – 50 000 somnan 75 000 somǵa deıin;
-
Joǵary bilimdi áskerı mindettiler (ofıtserlik rezerv daıyndyǵynan ótý) – 70 000 somnan 90 000 somǵa deıin.
Sońǵy ret tólem mólsheri 2017 jyly qaıta qaralǵan bolatyn. Ol kezde Qyrǵyzstandaǵy ortasha jalaqy 14 300 somdy qurasa, 2024 jyly bul kórsetkish 35 791 somǵa jetip otyr – ıaǵnı eki eseden asa ósim baıqalady. Zań jobasy osy ózgeristerge saı tólemderdi beıimdeýdi kózdeıdi.
Sonymen qatar áskerı esepke turý erejelerin buzǵany úshin ákimshilik aıyppuldardy arttyrý usynylady:
- áskerı bılet joǵaltý nemese búldirý;
- derekterdi ýaqytynda jańartpaý;
- mobılızatsııa zańnamasyn buzý.
- Quqyq buzýshylarǵa qatysty sanktsııa tańdaýda laýazymdy tulǵalarǵa beriletin erkindik alynyp tastalady — bul korrýptsııalyq táýekelderdi tómendetý úshin qajet.
Qyrǵyzstanda balamaly áskerı qyzmet 1993 jyldan beri zańdy túrde engizilgen. Ol áskerı qyzmetti dinı senimderge, densaýlyq jaǵdaıyna, otbasylyq sebepterge nemese qoǵamǵa paıdaly eńbekke aralasý nıetine baılanysty almastyrýǵa múmkindik beredi.
Jańa zań jobasy Úkimet tapsyrmasymen ázirlenip, áskerı mindettilik salasynda ashyqtyqty, ádilettilikti jáne qarjylyq teńgerimdi arttyrýdy kózdeıdi.
Osyǵan deıin Qyrǵyzstanda esirtkige baılanysty qylmystar úshin jaza qatańdatylǵany anyqtaldy.