Qyrǵyzstanda balalardyń áleýmettik jelilerge kirýine shekteý qoıylady
ASTANA. KAZINFORM – Qyrǵyzstannyń Oqý-aǵartý mınıstri Dogdýrkúl Kendırbaeva kámeletke tolmaǵandardyń áleýmettik jelilerge kirýine shekteý qoıylýy múmkin ekenin málimdedi. Bul týraly Kazinform agenttiginiń Bishkektegi menshikti tilshisi jergilikti BAQ-qa silteme jasap habarlaıdy.
Mınıstrdiń aıtýynsha, balalar eresekterdiń baqylaýynsyz ınternette kóp otyrady. Osyǵan baılanysty olardyń qandaı aqparatty kórip, qandaı kontentti tutynyp júrgenin baqylaý múmkin emes. Ásirese bastaýysh synyp oqýshylaryna qatysty alańdaýshylyq bar. Olar kúnine nebári úsh saǵat sabaqta bolady, al qalǵan ýaqytyn úıde ótkizedi.
— Qazir bul máseleni qarastyryp jatyrmyz. Mektepterde sabaq kezinde telefon paıdalanýǵa tyıym salynǵan. Olardy tek muǵalimniń baqylaýymen oqý maqsatynda paıdalanýǵa ruqsat etiledi, — dedi mınıstr.
Mınıstrliktiń málimdeýinshe, Qyrǵyzstan da álemniń birqatar eli qolǵa alǵan sharalarǵa qosylýy kerek. Qazirdiń ózinde balalardyń áleýmettik jelilerdi paıdalanýyn shekteý boıynsha halyqaralyq tájirıbe qalyptasqan.
Eske sala keteıik, Qyrǵyzstanda 2024 jyldyń sáýirinen bastap barlyq paıdalanýshy úshin tanymal TikTok áleýmettik jelisine shekteý salynǵan. Elde bul platformany qaıta ashý týraly birneshe ret usynys aıtyldy. Qyrǵyzstanda TikTok-ty qaıta ashý máselesi qaıta kóterildi.
Aqzat Baqytjanqyzy
