Qyrǵyzstanda bala saýdasy úshin qazaqstandyq áıel 12 jylǵa sottaldy
ASTANA. KAZINFORM — Bishkektiń Pervomaı aýdandyq soty bala saýdasy jáne olarǵa qatysty azǵyndyq áreketke qatysty qylmystyq is boıynsha Qazaqstan azamatyn sottady, dep habarlaıdy Kazinform agenttiginiń Bishkektegi tilshisi.
Ulttyq qaýipsizdik memlekettik komıtetiniń baspasóz qyzmetiniń habarlaýynsha, 2024 jyldyń qyrkúıeginde qazaqstandyq áıel A.A. men Qyrǵyzstan azamaty S. S. Qyrǵyzstan Qylmystyq kodeksiniń 167-baby «Bala saýdasy» boıynsha kámeletke tolmaǵandardy elden tys jerlerge zańsyz áketý boıynsha qozǵalǵan qylmystyq is aıasynda ustalyp, Ulttyq qaýipsizdik memlekettik komıtetiniń tergeý ızolıatoryna qamaldy.
Tergeý A.A.-nyń Izraıl azamaty A.B.-men qylmystyq kelisimge kelip, Qyrǵyzstan azamaty S. S.-dan úsh kámeletke tolmaǵan balany aqshalaı jáne basqa da múliktik ótemaqy úshin satyp alǵanyn anyqtady. Sodan keıin olar balalardy sheshindirip, olardyń jynystyq múshelerin ashyp, ádepsiz áreketter jasaǵan. Bul protsess fotoǵa túsirilip, olar habar almasý qoldanbalary arqyly sheteldik tapsyrys berýshilerge jiberilgen.
Sonymen qatar, joǵaryda atalǵan qylmystyq top Qyrǵyzstan azamaty D. K.-nyń eki kámeletke tolmaǵan balasyn qamqorlyqqa alyp, olarǵa da osyndaı áreketter jasaǵan.
2026 jyldyń 12 naýryzynda Pervomaı aýdandyq soty Qazaqstan azamaty A.A.-ny 12 jylǵa, al Qyrǵyzstan azamaty S. S.-ny múlkin tárkileýmen 11 jylǵa bas bostandyǵynan aıyrý jazasyna kesti.
Buǵan deıin Qyrǵyzstanda kámeletke tolmaǵandardy zańsyz asyrap alyp, keıinnen satý maqsatynda shetelge tasymaldaǵan turaqty transulttyq qylmystyq uıymnyń qyzmeti toqtatylǵan.
Aıta keteıik, 2025 jyly Qyrǵyzstanda balalar men múgedekterge qatysty jynystyq qylmys jazasy kúsheıtilgen bolatyn.
