Qyrǵyzstanda BAQ týraly zań jobasy qaıta qaraý úshin keri qaıtaryldy

ASTANA. KAZINFORM – Qyrǵyz Respýblıkasynyń Prezıdenti Sadyr Japarovtyń tapsyrmasy boıynsha Jogorký Keneshte qaralyp jatqan BAQ týraly zań jobasy keri qaıtaryldy.

Memleket basshysynyń baspasóz hatshysy Asqat Alagózovtiń habarlaýynsha, Sadyr Japarov eldegi BAQ basshylarymen keńes ótkizip, onyń barysynda el Parlamentinde qaralyp jatqan «Buqaralyq aqparat quraldary týraly» Qyrǵyz Respýblıkasynyń zań jobasy talqylandy.

«Kezdesý qorytyndysy boıynsha BAQ ókilderiniń aqparatyn tyńdap, olardan túsken usynystardy eskere otyryp, Sadyr Japarov atalǵan zań jobasyn pysyqtaýdy tapsyrdy», - dep habarlady baspasóz hatshysy.

Eske sala ketsek, Qyrǵyzstanda «Buqaralyq aqparat quraldary týraly» qoldanystaǵy Zańy 1992 jyly 2 shildede qabyldanǵan. Jańa zań qabyldaý qajettiligi qoldanystaǵy zańnyń quqyqtyq resýrsynyń kúshi joqtyǵyna jáne qazirgi qoǵam shyndyǵyna sáıkes kelmeıtin moraldyq turǵydan eskirýinen týyndap otyr. Prezıdent ákimshiligi ázirlegen «Buqaralyq aqparat quraldary týraly» jańa zań jobasy bıylǵy qańtarda Qyrǵyz Respýblıkasynyń Jogorký Keneshiniń qaraýyna jiberilgen bolatyn.