Qyrǵyzstanda BAQ pen ınternet arqyly qorlaý men jala japqandarǵa jaza kúsheıtiledi
ASTANA.KAZINFORM - Qyrǵyzstanda BAQ pen ınternet saıttarynda jáne áleýmettik jelilerde jala jabý men qorlaýǵa joǵary aıyppul engizý usynyldy. Jogorký Keneshtiń Quqyqtyq tártip, qylmysqa qarsy kúres jáne sybaılas jemqorlyqqa qarsy is-qımyl komıteti «Qyrǵyz Respýblıkasynyń Qylmystyq kodeksine ózgerister engizý týraly» zań jobasyn birinshi oqylymda maquldady.
Zań jobasynda buqaralyq aqparat quraldarynda jáne ınternet-saıttarda balaǵattaý nemese jala japqany úshin jeke tulǵalarǵa 1000 eseptik kórsetkish (100 myń som), zańdy tulǵalarǵa 2000 eseptik kórsetkish (200 myń som) mólsherinde aıyppul salý kózdelgen.
Qyrǵyzstan Respýblıkasy Ádilet mınıstriniń orynbasary Orozbek Sydyqovtyń aıtýynsha, áleýmettik jelilerdegi jazbalar astyndaǵy jala nemese qorlaý sıpattaǵy pikirler úshin de jaýapkershilik qarastyrylǵan.
Buǵan deıin Qyrǵyzstanda ınternette jala jabý men balaǵattaý úshin jazany kúsheıtý usynylǵany habarlanǵan bolatyn. Sonymen qatar elde azamattardyń ótinishterin qaraý tártibin buzǵany úshin memlekettik qyzmetkerlerdiń jaýapkershiligin kúsheıtý usynyldy.
Sondaı-aq, balalaryn qorǵanyshy men qamqorshysynsyz qaldyryp, eńbek kóshi-qonymen ketken ata-analarǵa aıyppul salý usynylyp otyr. Mektepterde aqsha jınaǵany úshin aıyppul engizý kózdeldi.
