Qyrǵyzstanda azyq-túlik qaýipsizdigi jáne tamaqtaný ǵylymı-zertteý ınstıtýty paıda bolady

BІShKEK. KAZINFORM – Bul týraly Azyq-túlik qaýipsizdigi jáne tamaqtaný jónindegi keńes otyrysynda Qyrǵyz Respýblıkasy Mınıstrler kabıneti tóraǵasynyń orynbasary – Sý resýrstary, aýyl sharýashylyǵy jáne óńdeý ónerkásibi mınıstri Baqyt Torobaev málim etti.

Sheneýniktiń aıtýynsha, Qyrǵyzstan prezıdenti Sadyr Japarovtyń tapsyrmasy boıynsha Azyq-túlik qaýipsizdigi jáne tamaqtaný ǵylymı-zertteý ınstıtýtynyń qurylýy agronomııa jáne veterınarııa salasynda ǵylymı zertteýler júrgizýge ǵana emes, sonymen qatar aýyl sharýashylyǵy ónimderin óndirý jáne óńdeý tehnologııalaryn jetildirý boıynsha usynymdar ázirleýge múmkindik beredi. Budan bólek, halyqaralyq uıymdar jáne ǵylymı mekemelermen azyq-túlik qaýipsizdigi salasyndaǵy ozyq álemdik tájirıbeni engizý boıynsha belsendi yntymaqtastyq josparlanyp otyr.

«Mekeme elimizdiń azyq-túlik qaýipsizdigin jaqsartatyn bilim men ınnovatsııa ortalyǵyna aınalady. Instıtýttyń quramy men laýazymyn bekitemiz. Bul bizdiń agroónerkásiptik saıasatymyzdy damytýdyń jańa kezeńine aınalatynyna senimdimin. Qyrǵyzstannyń árbir azamatynyń sapaly jáne qaýipsiz azyq-túlikke qol jetkizýi úshin bárimiz birlesip jumys isteýimiz kerek. Bul bizdiń ortaq mindetimiz», – dedi B.Torobaev.

Sý resýrstary, aýyl sharýashylyǵy jáne óńdeý ónerkásibi mınıstrliginiń málimetinshe, 2024 jyldyń qańtar-shilde aılarynda 9 negizgi áleýmettik mańyzy bar azyq-túlik taýarlarynyń 7 túri boıynsha Qyrǵyzstan óz naryǵyn otandyq óndiris arqyly tolyq qamtamasyz etedi. Atap aıtqanda, nan ónimderi – 86,5%, kartop – 162,8%, kókónister men jemister – 159%, et – 79,1%, sút – 116,3%, qant – 49,2%, jumyrtqa – 71,4%, ósimdik maıy – 48,5%.