Qyrǵyzstan azamattarynyń Qazaqstanda bolý erejesi qaıta qaralýy múmkin

ASTANA. KAZINFORM — Jogorký Kenesh otyrysynda depýtat Aıgúl Ahmedova úkimetke Qyrǵyzstan men Qazaqstan azamattarynyń ózara bolý tártibin qaıta qaraý týraly usynys jasady, dep habarlaıdy Kazinform agenttiginiń Bishkektegi menshikti tilshisi.

Parlament múshesiniń aıtýynsha, 2025 jylǵy 1 qyrkúıekten bastap kúshine engen jańa erejege sáıkes, Qyrǵyzstan azamattary Qazaqstan aýmaǵynda kez kelgen 180 kúndik kezeń ishinde jıyntyǵy 90 kúnnen artyq bola almaıdy.

Aıgúl Ahmedova engizilgen kóshi-qon shekteýleri shekara mańyndaǵy turǵyndardyń saýda qyzmetine keri áserin tıgizip otyrǵanyn atap ótti. Osyǵan baılanysty depýtat mınıstrler kabınetin atalǵan talaptardy qaıta qaraýǵa shaqyrdy.

Eske salsaq, Qazaqstan azamattary da Qyrǵyzstan aýmaǵynda alǵashqy kirgen kúnnen bastap árbir 180 kún ishinde jıyntyǵy 90 kúnge deıin bola alady. Qazaqstandyqtar alǵashqy 30 kún ishinde tirkeýden bosatylady. Bul merzimnen asqan jaǵdaıda tirkelý qajet. Eger azamat el aýmaǵynda 90 kúnnen artyq tirkeýsiz júrse, keıingi kirýi úsh aıǵa shekteledi.