Qyrǵyzstanda áıelder maskasy men parıgin kıip dúken tonaǵan qylmystyq toptyń toǵyz múshesi ustaldy
ASTANA.KAZINFORM - Qyrǵyzstanda 15 adamnan turatyn uıymdasqan qylmystyq toptyń joly kesildi, dep habarlaıdy Kazinform agenttiginiń Bishkektegi tilshisi.
Qyrǵyzstan Іshki ister mınıstrliginiń málimeti boıynsha, uıymdasqan qylmystyq toptyń toǵyz múshesi el boıynsha birqatar iri urlyq pen qarý qoldanyp tonady, degen kúdikpen ustaldy. Olardyń barlyǵy buryn birneshe ret sottalǵan jáne uıymdasqan qylmystyq toptyń belsendi músheleri retinde tirkelgen.
Saýda núkteleri men keńselerge jasalǵan qarýly shabýyldar kezinde qylmyskerler ózderin tanymaý jáne kýágerlerdi adastyrý úshin dál áıeldiń bet-álpeti sııaqty kórinetin sılıkon maskalar men parık paıdalanǵan.
Keltirilgen materıaldyq zalaldyń jalpy somasy 25 mıllıon somdy qurady.
Tintý kezinde seıfter men esikterdi ashýǵa arnalǵan jabdyqtar, sondaı-aq ártúrli kúrdeliliktegi qulypty ashýǵa arnalǵan qurylǵylar, radıoqabyldaǵyshtar, zattardy baqylaýǵa arnalǵan GPS trekerler, qaýipsizdik júıeleri men dabyldardy bógeýge arnalǵan qurylǵylar, oqtalǵan magazıni bar AKSU avtomaty (30 oq), 20 oqty Makarov tapanshasy, Makarov travmatıkalyq tapanshasy, F-1 jaýyngerlik qol granatasy, pyshaqtar jáne shamamen 45 gramm gashısh tárkilendi.
Top músheleri men túzeý kolonııalarynda jazasyn ótep jatqan alty adamnyń arasyndaǵy baılanys ta anyqtaldy. Aldyn ala aqparat boıynsha, bostandyqta júrgen adamdar qylmys jasaǵan, sodan keıin sottalǵandar ózderine yńǵaıly ýaqyt aralyǵyn tańdap, kináni óz moınyna alǵan.
Ustalǵandarǵa Qyrǵyzstan Respýblıkasy Qylmystyq kodeksiniń 261-babynyń 2-bóligi «Uıymdasqan top qurý nemese oǵan qatysý» boıynsha aıyp taǵyldy.
Buǵan deıin Qyrǵyzstanda telefon alaıaqtaryna kómektesetin arna jabylǵan bolatyn.