Qyrǵyzstanda aýrýhanalarǵa tıesili 32 ǵımarat zańsyz jekemenshikke ótken
ASTANA. KAZINFORM — Ulttyq qaýipsizdik memlekettik komıteti (UQMK) Jalal-Abad oblysyndaǵy medıtsınalyq mekemeler aýmaǵynda ornalasqan birqatar nysandardyń jekemenshikke zańsyz berilýi jáne uzaq merzimge jalǵa tapsyrylýy derekterin anyqtady, dep jazdy 24 kg.
Vedomstvonyń málimetinshe, jedel-izdestirý sharalary barysynda Manas qalasyndaǵy Jalal-Abad oblystyq klınıkalyq aýrýhanasynyń, sondaı-aq Bazar-Qorgon jáne Kochkor-Ata aýrýhanalarynyń aýmaǵynda ornalasqan 32 ákimshilik ǵımarat pen 5 jer teliminiń zańsyz ıelikten shyǵarylyp, kommertsııalyq maqsatta paıdalanylǵany belgili boldy. Atalǵan nysandarda jeke medıtsınalyq ortalyqtar, dárihanalar, saýda oryndary jáne jedel tamaqtaný núkteleri jumys istegen.
UQMK atap ótkendeı, 1995 jylǵy 16 aqpandaǵy №37 Prezıdent jarlyǵyna sáıkes áleýmettik ınfraqurylym nysandary jekeshelendirýge jatpaıdy. Sonymen qatar, Jer kodeksiniń 44-babyna sáıkes ǵımarattar men qurylystar ózderine bekitilgen jer telimine qatysty quqyqtan bólinbeıdi.
Tergeý barysynda nysandardy zańsyz paıdalaný kezeńinde jaldaý aqysy ádeıi tómendetilgeni anyqtalyp, bul memleketke aıtarlyqtaı qarjylyq shyǵyn keltirgen. Múlik memlekettik menshikke qaıtarylǵannan keıin jaldaý sharttary qaıta qaralyp, bıýdjetke túsetin túsim birneshe ese artqan.
Zańsyz ıelikten shyǵarylǵan barlyq ǵımarattar men jer telimderi memleket menshigine qaıtaryldy. Tergeý jumystary jalǵasyp jatyr.
Eske sala keteıik, buǵan deıin Qyrǵyzstanda túnde alkogol satýǵa tyıym salý usynyldy.
