Qyrǵyzstanda aýyl sharýashylyǵy sanaǵy bastaldy

ASTANA. KAZINFORM — 2026 jylǵy 20 naýryzdan bastap Qyrǵyz Respýblıkasynyń aýmaǵynda aýyl sharýashylyǵy sanaǵy júrgizile bastaıdy. Bul týraly Ulttyq statıstıka komıteti habarlady, dep jazady Kabar.

Vedomstvonyń málimetinshe, aýyl sharýashylyǵy sanaǵy — eldegi aýyl sharýashylyǵynyń jaı-kúıi týraly ózekti ári senimdi aqparat alýǵa baǵyttalǵan mańyzdy memlekettik statıstıkalyq shara.

Sanaq aıasynda kelesi málimetter jınalady:

• aýyl sharýashylyǵy jerleriniń bar-joǵy jáne paıdalanylýy;

• aýyl sharýashylyǵy daqyldarynyń egis alqaptary;

• aýyl sharýashylyǵy janýarlary men qustar sany;

• aýyl sharýashylyǵy tehnıkasynyń bolýy;

• sharýa (fermerlik) qojalyqtar men jeke qosalqy sharýashylyqtardyń qyzmeti.

Alynǵan nátıjeler memlekettik saıasatty qalyptastyrýǵa, agrarlyq sektordy damytý baǵdarlamalaryn ázirleýge jáne aýyl sharýashylyǵy taýar óndirýshilerine kórsetiletin memlekettik qoldaýdyń tıimdiligin arttyrýǵa paıdalanylatyn bolady.

Sanaq júrgizý aýyl sharýashylyǵy salasynyń naqty jaǵdaıyn anyqtaýǵa, onyń damý baǵyttaryn belgileýge jáne basqarýshylyq sheshimderdiń sapasyn arttyrýǵa múmkindik beredi.

Ulttyq statıstıka komıteti azamattardy sanaq júrgizýge túsinistikpen qarap, qajetti aqparat usyný arqyly sanaq qyzmetkerlerine qoldaý kórsetýge shaqyrady.

Berilgen málimetterdiń qupııalylyǵy kepildendiriledi. Aqparat Qyrǵyz Respýblıkasynyń zańnamasyna sáıkes tek jalpylanǵan túrde ǵana paıdalanylatyn bolady.

Budan buryn Qazaqstanda 1 tamyzda bastalǵan Ulttyq aýyl sharýashylyǵy sanaǵy 21 qazanda aıaqtalǵanyn jazdyq.