Qyrǵyzstanda ata-anasyn asyraýdan jaltarǵan balalar jazaǵa tartylady

ASTANA. KAZINFORM – Qyrǵyzstanda múgedek jáne materıaldyq kómekke muqtaj ata-anasyn asyraýdan bas tartqan, sondaı-aq balalaryna alıment tólemegender úshin jaza qataıtylyp jatyr.

Jogorký Kenesh depýtattary keıbir zańnamalyq aktilerge tıisti túzetýlerdi úshinshi oqylymda maquldady.

Zań jobasy ata-analardyń óz balalaryna qatysty alımenttik mindettemelerdi oryndamaǵany nemese tolyq oryndamaǵany, sondaı-aq kámeletke tolǵan eńbekke qabiletti balalardyń materıaldyq kómekke muqtaj qart ata-analaryn asyraýdan jaltarǵany úshin jazany qataıtý maqsatynda ázirlengen.

Túzetýlerge sáıkes, sot aktisi nemese alıment óndirý týraly kelisim negizinde ata-analardy alımenttik mindettemelerdi tólemegeni úshin 60 saǵattan 100 saǵatqa deıingi merzimge qoǵamdyq jumystarǵa tartý nemese 9 aıǵa deıin bas bostandyǵynan aıyrý túrinde jaza taǵaıyndalady.

Materıaldyq kómekke muqtaj qart ata-anany asyraý úshin sot aktisi nemese alıment óndirý týraly kelisim negizinde eńbekke qabiletti kámeletke tolǵan balalaryna alıment tóleýden jaltarǵany úshin 500-den 1000-ge deıingi eseptik kórsetkish mólsherinde aıyppul salýǵa (50 - 100 myń som) nemese 60 saǵatqa deıingi merzimge qoǵamdyq jumystarǵa tartý nemese 9 aıǵa deıingi merzimge bas bostandyǵynan aıyrý túrindegi jaza kózdelgen.

Bul rette, jaza qoldanylǵannan keıin bir jyl ishinde quqyq buzýshylyq týraly zańnamaǵa sáıkes jaýapqa tartylǵan ata-analardyń alıment boıynsha mindettemelerdi oryndamaýy nemese tolyq oryndamaýy alıment tóleý týraly kelisim nemese sot aktisi negizinde qaıtalap jasalǵan oryndamaý nemese tolyq oryndamaý dep tanylady. Tulǵa alımenttik mindettemeler boıynsha bereshegin tolyq ótegen jaǵdaıda jaýapkershilikten bosatylady.

Buǵan deıin habarlanǵandaı, Qyrǵyzstanda BAQ pen ınternet saıttarynda jáne áleýmettik jelilerde jala jabý men qorlaýǵa joǵary aıyppul engizý usynyldy.