Qyrǵyzstanda ár besinshi stýdent ustazdyq mamandyqty tańdaıdy

ASTANA. KAZINFORM — 2024-2025 oqý jylynda eldegi joǵary oqý oryndary 8 myńnan astam bolashaq muǵalimdi daıarlap shyǵardy, dep habarlaıdy Kabar.

2014 jyly Qyrǵyzstanda Úkimet qaýlysymen jyl saıyn 5 qazanda atap ótiletin Bilim berý qyzmetkerleriniń kúni resmı túrde bekitildi.

Salalyq vedomstvolardyń derekterine sáıkes, respýblıkadaǵy jumys isteıtin halyqtyń shamamen 10%-y bilim berý salasynda eńbek etedi. Qazirgi tańda elde 5 myńǵa jýyq mektepke deıingi, mektep, orta jáne joǵary bilim berý uıymy jumys isteıdi. Bul mekemelerde 131 myńnan astam pedagog eńbek etip, 2 mıllıonnan astam bala, oqýshy jáne stýdentti oqytyp, tárbıeleýde.

2024-2025 jańa oqý jylynda elde 2 394 kúndizgi jalpy bilim beretin mektep jumys isteıdi, onda 94 myńǵa jýyq muǵalim qyzmet atqarady:

• Qalalyq jerlerde — 33 myńnan astam pedagog,

• Aýyldyq jerde — 60 myńnan astam muǵalim eńbek etip keledi.

Qyrǵyzstanda muǵalim mamandyǵy dástúrli túrde áıelderdiń kásibi bolyp sanalady: mektep muǵalimderiniń 87%-y — áıelder, olardyń 8%-y basshylyq qyzmette (dırektor nemese dırektordyń orynbasary). Sonymen qatar pedagogterdiń kásibı daıyndyǵy joǵary deńgeıde — muǵalimderdiń 87%-y joǵary bilimge ıe.

Mektepterdegi ortasha júkteme — bir muǵalimge 16 oqýshydan keledi. Qalalyq mektepterde bul kórsetkish 20 oqýshyǵa deıin jetse, aýyldyq jerlerde — shamamen 15 oqýshyny quraıdy.

Elde muǵalim mamandyǵyna degen qyzyǵýshylyq saqtalyp otyr. Sebebi Qyrǵyzstan JOO stýdentteriniń ár besinshisi pedagogıkalyq baǵytty tańdaıdy. 

Budan buryn Qyrǵyzstan bıligi azamattaryn elektr energııasyn únemdeýge shaqyrǵanyn jazǵan edik.