Qyrǵyzstanda alkogol, tátti sýsyn men janar-jaǵarmaıǵa salynatyn aktsızder ulǵaımaq
BІShKEK. KAZINFORM — Qyrǵyzstanda qymbat alkogol, tátti sýsyndar men munaı ónimderine salynatyn aktsız salyǵyn kezeń-kezeńimen arttyrý josparlanyp otyr, dep jazdy Kazinform agenttiginiń menshikti tilshisi.
Úkimettiń tıisti qaýly jobasy qoǵamdyq talqylaýǵa shyǵaryldy.
Eldegi alkogoldi, alkogolsiz ónimder men munaı ónimderine salynatyn qoldanystaǵy aktsız salyǵynyń mólsherlemeleri 2023 jyldyń 1 qańtarynan beri ózgermegen, al janar-jaǵarmaı materıaldaryna 10 jyldan astam ýaqyt boıy kóterilmegen.
Qujatqa sáıkes, aktsızdik salyq mólsherlemelerin tórt jyl ishinde birtindep arttyrý usynylady. Bul shara halyqty zııandy ónimderdi tutynýdan qorǵaý, olardyń baǵasyn ınflıatsııa deńgeıinen joǵary kóterý jáne memlekettik bıýdjetke túsetin salyq túsimderin arttyrý maqsatynda qolǵa alynyp otyr.
2026 jylǵy 1 qańtardan bastap mynadaı ózgerister engiziledi:
-
Benzınge — tonnasyna 5000 somnan (shamamen 31 myń teńge) 7000 somǵa (shamamen 43 myń teńge) deıin;
-
Mazýtqa — 400 somnan (shamamen 2500 teńge) 2000 somǵa (shamamen 12 myń teńge) deıin;
-
Qysqy dızel otynyna — 400 somnan 2000 somǵa deıin;
Sondaı-aq:
-
Tátti, mıneraldy jáne gazdalǵan sýlarǵa salynatyn aktsız 2027 jylǵa qaraı 5 som/lıtrge deıin ósedi;
-
Energetıkalyq alkogolsiz sýsyndar — 2029 jylǵa deıin 15 somǵa deıin kóteriledi;
-
Lıker-araq ónimderi, araq, kúsheıtilgen ishimdikter, etıl spırti — 240 somǵa deıin;
-
Konıak — 180 som;
-
Sharap — 40 som;
-
Syra — 30 som;
-
Gazdalǵan sharap pen shampan — 70 som;
-
Slaboalkogoldi sýsyndar — 2026 jyldan bastap 100 som/lıtr.
Eske sala keteıik, Qyrǵyz Respýblıkasynda 2025 jylǵy 1 qańtardan bastap jol jóndeýge arnalǵan janar-jaǵarmaıǵa 1 som/lıtr mólsherinde alym engiziledi.
2025 jyldyń maýsymynda Qyrǵyzstannyń Densaýlyq saqtaý mınıstrligi qoǵam densaýlyǵyn jaqsartý maqsatynda temekige salynatyn aktsız salyǵyn arttyrýdy usynǵan bolatyn.
Sondaı-aq, Qyrǵyzstanda salyqtyq ákimshilendirý jeńildetilgeni, kólik salyǵy joıylǵany jáne salyqtyq amnıstııa jarııalanǵany habarlandy.
Buǵan deıin habarlanǵandaı, Qyrǵyzstan halyqaralyq ınternet-trafıkke monopolııa engizdi.