Qyrǵyzstanda alǵashqy kún elektr stantsııasy iske qosyldy

ASTANA. KAZINFORM — Eldiń Shý oblysyna qarasty Kemın aýdanynda alǵashqy kún elektr stantsııasy paıdalanýǵa berildi, dep habarlaıdy Kazinform menshikti tilshisi.

Qýattylyǵy 100 megavatt bolatyn stantsııa jylyna shamamen 210 mln kVt·saǵ taza elektr energııasyn óndiredi, al kómirqyshqyl gazynyń shyǵaryndylary 120 myń tonnaǵa qysqarady. Investıtsııa kólemi 56 mln AQSh dollaryn qurady. Bul joba kún energetıkasyna salynǵan ınvestıtsııalar kólemi boıynsha eń iri jobalardyń biri sanalady.

Kún elektr stantsııasyn iske qosý saltanatty rásiminde Qyrǵyz Respýblıkasynyń prezıdenti Sadyr Japarov jańartylatyn energııa kózderin belsendi damytýsyz halyqty jáne ekonomıka sýbektilerin turaqty elektrmen tolyq qamtamasyz etý múmkin emes ekenin atap ótti.

— Kún elektr stantsııasynyń ashylýy — elimizdiń energetıkalyq táýelsizdigin nyǵaıtýdaǵy jáne jańartylatyn energııa kózderin damytýdaǵy mańyzdy kezeńniń bastaýy, — dedi Qyrǵyzstan Prezıdenti.

Ol eldi damyǵan ári zamanaýı memleketke aınaldyrý jolynda turaqty jáne taza energııa kózderine kóshýdiń mańyzdylyǵyn erekshe atap ótti.

Eske sala keteıik, Qyrǵyzstanda elektr energııasynyń tapshylyǵy baıqalady. Elektr qýatyn únemdeý maqsatynda eldegi memlekettik ákimshilik mekemelerde saǵat 18:00–den 06:00–ge deıin ishki jáne syrtqy jaryqtandyrý men elektr quraldaryn paıdalaný shekteldi. Mektepterde de elektr energııasyn únemdeý sharalary engizildi.

2025 jylǵy qyrkúıekte Qyrǵyz Respýblıkasynyń energetıka mınıstri «Kabar» aqparat agenttigine bergen suhbatynda aldaǵy qys eń qıyn kezeń bolatynyn eskertip, azamattardy elektr energııasyn únemdeýge shaqyrǵan bolatyn. Qazirgi tańda memleket tutynatyn elektr energııasy óndiriletin kólemnen asyp túsip otyr. Tapshylyq kórshiles elderden elektr energııasyn ımporttaý arqyly jabylady.