Qyrǵyzstanda alǵashqy 12 jyldyq mektep attestaty 2029 jyly beriledi

ASTANA.KAZINFORM - Qyrǵyzstan prezıdenti Sadyr Japarov bul týraly «Kabar» aqparat agenttigine bergen suhbatynda málimdedi, dep habarlaıdy Kazinform.

Qyrǵyzstan basshysy 12 jyldyq bilim berýge kóshý zaman talaby ekenin atap ótti.

- Birinshiden, álemdik standart bar, ekinshiden, álemdik bilim berý naryǵynyń talaby bar. Biz álemdik eńbek naryǵy men bilim berý keńistigine ıntegratsııalanýmen qatar júrýimiz kerek. Alǵashqy 12 jyldyq mektep sertıfıkattary 2029 jyly beriledi. Áıtpese, álemdik standarttarǵa saı keletin mektepterdi bitirmegen túlekter sheteldegi joǵary oqý oryndaryna túsýge daıyndalýǵa qosymsha bir jyl jumsaýǵa májbúr bolady. Qyrǵyzstan úshin álemdik ekonomıkada básekege qabiletti adamı kapıtaldy damytý óte mańyzdy, - dedi ol.

Sadyr Japarov mektepterdegi orynnyń jetispeýshiligi men oqýshylardyń tyǵyzdyǵy týraly jıi qoıylatyn suraqqa da jaýap berip, máseleniń 12 jyldyq bilim berýge kóshýmen baılanysty emes ekenin aıtty. Ol sońǵy 10 jylda eldegi mektep oqýshylarynyń sany 500 myńǵa ósip, 1 536 633-ke jetkenin málimdedi.

- Eldiń demografııalyq ósýi, sondaı-aq qala ortalyqtaryna ishki kóshi-qonnyń artýy, ásirese qalalarda qosymsha mektepter men balabaqshalar salý qajettiligine ákeldi, - dedi Qyrǵyzstan prezıdenti.

Ol mektep tapshylyǵy máselesi kezeń-kezeńimen sheshiletinin jáne bul baǵyttaǵy jumystar júıeli túrde júrgizilip jatqanyn atap ótti.

Buǵan deıin Qyrǵyzstan sybaılas jemqorlyq pen uıymdasqan qylmysqa qarsy sheshýshi jáne júıeli kúres júrgizip jatqany habarlanǵan bolatyn.