Qyrǵyzstanda alǵash ret ushaq bortynda sán kórsetilimi ótti
ASTANA. KAZINFORM — Qyrǵyzstanda alǵash ret biregeı mádenı joba júzege asyryldy. Sán kórsetilimi Bishkek–Qaraqol baǵytyndaǵy ushaq bortynda ótti. Bul týraly Mádenıet, aqparat jáne jastar saıasaty mınıstrligi habarlady, dep jazady Kabar.
Kórsetilimniń negizgi bóliginde qyrǵyzstandyq tanymal dızaınerdiń avtorlyq toptamasy usynyldy.
Dızaıner uzaq jyldar boıy qyrǵyzdyń dástúrli oıý-órnekteri men etnıkalyq elementterin zamanaýı stılde úılestirip, ulttyq mádenıetti halyqaralyq deńgeıde nasıhattap keledi.
Sán kórsetilimi tikeleı ushý barysynda ótti: modelder ushaq salonynda júrip, toptamany tanystyrdy. Іs-sharaǵa kásibı modeldermen qatar tanymal blogerler men ártister qatysty. Jobanyń ereksheligi – onyń tosyn formaty boldy, óıtkeni keıbir jolaýshylar úshin kórsetilim kútpegen syıǵa aınaldy.
Jobanyń ıdeology ári bastamashysy — rejısser, Qyrǵyz Respýblıkasynyń mádenıet salasynyń úzdigi Olesıa Semıkoz.
Aıta keteıik, bul joba tek Qyrǵyzstanda ǵana emes, búkil óńirde alǵash ret júzege asyrylyp, eldiń kreatıvti ındýstrııalarynyń áleýetin kórsetti.
Buǵan deıin habarlanǵandaı, Qyrǵyzstanda joldar men qoǵamdyq oryndardaǵy qaıyr suraýshylyqpen kúresýge, sondaı-aq osal toptardy osyndaı áreketterge tartýdan qorǵaýǵa baǵyttalǵan zańǵa qol qoıyldy.