Qyrǵyzstanda alǵash ret aspaly jol ashyldy
BІShKEK. KAZINFORM – Bishkek mańyndaǵy memlekettik «Ala-Archa» tabıǵı parkinde gondoldyq aspaly joldyń ashylý saltanaty ótti.
Saltanatty ashylý rásiminde Qyrǵyzstan Prezıdenti Sadyr Japarov sońǵy jyldary memleket tarapynan «Ala-Archa» tabıǵı parki ınfraqurylymynyń tolyq jańartylǵanyn, týrıster úshin zamanaýı jáne yńǵaıly jaǵdaılar jasalǵanyn atap ótti.
Jańa aspaly joldyń uzyndyǵy 1 kılometrdi quraıdy jáne saǵatyna myń adamǵa deıin qyzmet kórsete alady. Joba álemge tanymal avstrııalyq Doppelmayr kompanııasy arqyly júzege asyryldy. Qazirgi ýaqytta atalǵan kompanııa Issyk-Kól oblysyndaǵy «Ala-Too Rezort» iri shańǵy kýrortynda da kanat joldar turǵyzyp jatyr.
— Biz tabıǵı parkti keshendi túrde damytý jumystaryn jalǵastyramyz. Aspaly joldyń ekinshi kezeńi baqylaý-ótkizý pýnktinen bastalyp, jalpy 12 kılometrdi qamtıdy. Ol ulttyq parktiń eń kórikti jáne qoljetimsiz aımaqtaryna jetedi, — dedi memleket basshysy.
Sonymen qatar, «Ala-Archa» tabıǵı parkinde zamanaýı rodelban, kottedjder jáne basseıni bar bes juldyzdy qonaq úı salynatyny aıtyldy.
Esterińizge sala ketsek, buǵan deıin Shý oblysynyń Kemın aýdanynda ekologııalyq taza Kemın-Sıtı qalasynyń qurylysyn júrgizý josparlanǵany habarlanǵan edi.