Qyrǵyzstanda alaıaqtyq úshin jaýapkershilik kúsheıtildi

ASTANA. KAZINFORM — Qyrǵyz Respýblıkasy Prezıdenti Sadyr Japarov alaıaqtyq jasaǵany úshin qylmystyq jaýapkershilikti kúsheıtýdi kózdeıtin «Qyrǵyz Respýblıkasynyń Qylmystyq kodeksine ózgerister engizý týraly» Zańǵa qol qoıdy, dep habarlaıdy Kazinform agenttiginiń menshikti tilshisi. 

Atalǵan zań 2025 jylǵy 25 qyrkúıekte Qyrǵyz Respýblıkasynyń Jogorký Keneshi tarapynan qabyldanǵan.

Qabyldanǵan túzetýlerge sáıkes, alaıaqtyq áreketterge qatysty jańa saralaýshy belgiler engizildi:

* aqparattyq-kommýnıkatsııalyq tehnologııalardy nemese ınternet jelisin paıdalaný arqyly;
* eki jáne odan da kóp tulǵaǵa qatysty;
* qyzmet babyn paıdalaný arqyly jasalǵan alaıaqtyq.

Sonymen qatar, Qyrǵyz Respýblıkasynyń Qylmystyq kodeksiniń 58, 88 jáne 92-baptaryna ózgerister engizildi, oǵan sáıkes:

* alaıaqtyq úshin qylmystyq qýdalaý merziminiń ótýine baılanysty qylmystyq jaýapkershilikten nemese aıyptaý úkimin oryndaýdan bosatý múmkindigi alynyp tastaldy;
* shartty túrde merziminen buryn bosatý tek qylmys saldarynan kelgen zalal tolyq ótelgen jaǵdaıda ǵana múmkin bolady.

Budan bólek, sot úkimin, sheshimin nemese ózge de sot aktisin oryndamaý úshin jazalar kúsheıtildi. Bul úshin 50 myńnan 100 myń somǵa deıin (shamamen 300 myńnan 600 myń teńgege deıin) aıyppul salý nemese úsh jyldan bes jylǵa deıin bas bostandyǵynan aıyrý jazasy qarastyrylǵan.

Buǵan deıin Qyrǵyzstanda jynystyq zorlyq-zombylyq úshin jaza engizýdi usynǵan edi.