Qyrǵyzstanda «Aq ilbis» ekologııalyq dálizi quryldy

ASTANA. KAZINFORM — Bıologııalyq ártúrlilikti saqtaý jáne sırek kezdesetin janýarlar men ósimdikter túrlerin qorǵaý maqsatynda Qyrǵyzstannyń Ystyqkól oblysynda «Aq ilbis» ekologııalyq dálizi quryldy, dep habarlaıdy Kazinform agenttiginiń menshikti tilshisi. 

Dáliz jalpy aýmaǵy 792 myń gektardan asatyn birneshe qorǵalatyn tabıǵı aýmaqty – «Han-Táńiri» memlekettik tabıǵı parkin, Sarychat-Eertash jáne Naryn qoryqtaryn biriktiredi.

Ony qurýdyń negizgi maqsattary – jabaıy janýarlar popýlıatsııasyn, sonyń ishinde qar barysyn saqtaý; ekojúıelerdi qorǵaý; sharýashylyq turǵysynan qundy, sırek jáne joıylyp ketý qaýpi tóngen túrlerdi qorǵaý.

Dáliz aýmaǵynda ósimdikter men janýarlardy jersindirýge, ý-hımıkattardy qoldanýǵa, radıoaktıvti qaldyqtardy kómýge, sondaı-aq ekojúıege keri áser etýi múmkin kez kelgen áreketke tyıym salynady.

Sonymen qatar, jabaıy janýarlar men ósimdikterdiń tirshilik etý jaǵdaıyn jaqsartýǵa baǵyttalǵan is-sharalarǵa ruqsat etiledi. Olarǵa ǵylymı zertteýler júrgizý, zańnamaǵa sáıkes orman resýrstaryn paıdalaný, orman mádenıetin otyrǵyzý jáne keıbir janýarlar túrleriniń sanyn retteý kiredi.

Buǵan deıin qar barysy Qyrǵyzstannyń ulttyq sımvoly retinde tanylǵanyn habarlaǵan edik. 

Aıta ketelik Qyrǵyzstanda meshit pen shirkeý qurylysyn retteıtin tetik engizý usynylǵan edi.