Qyrǵyzstanda aq qalpaq jáne ulttyq kıim kúni atalyp ótti
ASTANA. KAZINFORM — Qyrǵyzstanda sársenbide aq qalpaq (Qyrǵyz ulttyq bas kıimi) jáne ulttyq kıim kúnin atap ótip jatyr, dep habarlaıdy Sınhýa.
Qyrǵyzstannyń memlekettik hatshysy Súıinbek Qasmambetov barlyq azamatty mereke kúnimen quttyqtady. Onyń aıtýynsha, ár halyqtyń ulttyq kıimi — onyń mádenıeti men tarıhyn beıneleıtin tańǵajaıyp kórinis.
— Aq qalpaqtan bastap bizdiń ulttyq kıimimiz de halqymyzdyń tarıhymen tyǵyz baılanysyp, búgingi kúnge deıin mádenı muranyń mańyzdy elementi retinde saqtalyp qaldy, ári turmysymyzdyń ajyramas bóligine aınaldy, — dedi S.Qasmambetov.
Qyrǵyzstannyń Memlekettik hatshysy atap ótkendeı, basty mindet — ata-baba murasyn, tili men dástúrlerin keıingi urpaqqa amanattaý.
— Búgin biz jahandaný dáýirinde ómir súrip jatyrmyz jáne tez damyp kele jatqan tehnologııalar aıasynda tarıhymyzdy da, mádenı muramyzdy da umytyp ketýge nemese joǵaltýǵa ákep soǵatyn qıyndyqtarǵa tap bolamyz. Turaqty ózgeristerge toly álemde bizdiń basty mindetimiz — ata-babalarymyzdyń murasyn, tili men dástúrlerin balalarymyzǵa amanat etý ekenin este ustaýymyz kerek, — dep atap ótti ol.
Dástúr boıynsha bul kúni er adamdar aq qalpaqtaryn kıedi. Mektepterde, joǵary oqý oryndarynda jáne basqa da memlekettik jáne mýnıtsıpaldyq vedomstvolarda ataýly kúnge arnalǵan saltanatty is-sharalar ótedi. Sonymen qatar, qalalar men aýyldarda túrli fleshmobtar men ulttyq kıimge qatysty konkýrstar ótkiziledi.
Aıta keteıik, aq qalpaq kúni 2011 jyly bekitilip, jyl saıyn 5 naýryzda atalyp ótedi. 2019 jyly aq qalpaq ıÝNESKO-nyń materıaldyq emes mádenı mura tizimine engizildi.
Budan buryn habarlanǵandaı, Qyrǵyzstan energetıka mınıstrligi halyqty elektr qýatyn únemdeýge shaqyrdy.