Qyrǵyzstanda AI-95 benzınine memlekettik baǵa retteýi alynyp tastaldy
ASTANA. KAZINFORM — Memleket budan bylaı AI-95 markaly benzın baǵasyn rettemeıdi, dep habarlaıdy Kazinform agenttiginiń Bishkektegi tilshisi.
Mınıstrler kabınetiniń qaýlysyna sáıkes, AI-95 benzıni ishki naryqta ýaqytsha memlekettik baǵany retteýge jatatyn áleýmettik mańyzy bar taýarlar tiziminen alynyp tastaldy.
Aıta keteıik, mamyr aıynyń sońynda el bıligi janar-jaǵarmaı materıaldaryn ımporttaýshylarǵa ýaqytsha sýbsıdııalar jáne otyn baǵasyn memlekettik retteý engizgen bolatyn. Bul sharalar ekonomıkalyq qaýipsizdikti qamtamasyz etýge, el halqyn janar-jaǵarmaımen úzdiksiz qamtamasyz etýge jáne ulttyq ekonomıkalyq sýbektilerge memlekettik qoldaý kórsetýge baǵyttalǵan.
Buǵan deıin Qyrǵyzstannyń Energetıka mınıstrligi elde otyn qory jetkilikti ekenin habarlaǵan bolatyn. Degenmen, ımportqa joǵary táýeldilikke baılanysty el álemdik baǵalardyń ózgerýine, logıstıkalyq táýekelderge jáne geosaıası jaǵdaıǵa táýeldi bolyp qala beredi. Turaqty jetkizilimdi qamtamasyz etý úshin Bishkek Qazaqstan, Reseı, Belarýs, Ázerbaıjan, Ózbekstan jáne Túrikmenstannyń quzyretti organdaryna resmı suranys jiberdi jáne jetkizilimderdi ártaraptandyrý jáne halyqaralyq yntymaqtastyqty keńeıtý boıynsha jumysyn jalǵastyryp jatyr.
Eske salsaq, Qazaqstan Qyrǵyzstannyń benzın jetkizýge qatysty resmı ótinishin qarastyryp jatqany belgili boldy.
Sondaı-aq, eldiń otyn baǵasynyń ósýin tejeý úshin benzın men dızel otynyna salynatyn salyqtardy ýaqytsha tómendetýdi usynyp otyrǵany habarlandy.
