Qyrǵyzstanda aǵza aıyrbastaýǵa tek týystary donor bola alady
ASTANA.KAZINFORM - Eldiń Mınıstrler kabıneti tiri donordan retsıpıentke aǵza transplantatsııalaýdy uıymdastyrý men tártibin aıqyndaıtyn adam aǵzalary men tinderin transplantatsııalaý týraly ereje bekitti, dep habarlaıdy Kazinform agenttiginiń menshikti tilshisi.
Qujatqa sáıkes, kámelettik jasqa tolǵan jáne transplantatsııalanatyn naýqaspen atasy men ájesine deıin tegi ortaq (ata-anasy, balalary, kámelettik jasqa tolǵan aǵa-inileri, atasy, ájesi, arǵy atasy, arǵy ájesi) zańdy quzyretti tulǵalar donor bola alady.
Transplantatsııany basqa medıtsınalyq quraldar men ádister tıimsizdigi dáleldengen jáne naýqastyń ómirin saqtaýǵa nemese onyń densaýlyǵyn qalpyna keltirýge kepildik bere almaǵan jáne medıtsınalyq qorytyndy negizinde júzege asyrylǵan jaǵdaıda ǵana jasaýǵa bolady.
Tiri donordyń aǵzasyn nemese tinin alýǵa, satyp alýǵa jáne transplantatsııalaýǵa tek memlekettik densaýlyq saqtaý uıymdarynda, Rejep Taıyp Erdoǵan atyndaǵy Qyrǵyz-túrik dostyǵy memlekettik aýrýhanasynda, Qyrǵyz Respýblıkasy Densaýlyq saqtaý mınıstrligi janyndaǵy M.M.Mamakeev atyndaǵy ulttyq hırýrgııa ortalyǵynda, Qyrǵyz Respýblıkasy Densaýlyq saqtaý mınıstrligi janyndaǵy Ana men bala ulttyq ortalyǵynda jáne Osh memlekettik ýnıversıtetindegi medıtsınalyq ortalyqta ruqsat etiledi.
Adamnyń aǵzasyn nemese tinin transplantatsııalaý erikti túrde májbúrleýsiz júzege asyrylatyny atalyp ótti. Adam aǵzalary men tinderin satyp alýǵa jáne satýǵa tyıym salynady. Elde búırek, baýyr jáne qan túzetin jasýshalardy (súıek kemigin) transplantatsııalaýǵa bolady.
Qyrǵyz Respýblıkasynda zańsyz halyq emine salynatyn aıyppul kólemi ulǵaıǵany osyǵan deıin habarlanǵan bolatyn.
2026 jyldan bastap qyrǵyz dárigerleriniń jalaqysy kóteriledi.