Qyrǵyzstanda adam jaldady dep kúdik keltirilgenderdiń ekeýi úıqamaqqa alyndy

ASTANA.KAZINFORM - Qyrǵyzstanda májbúrlep adam jaldaýǵa qatysy bar degen tórt kúdiktiniń ekeýi úıqamaqqa alyndy, dep habarlaıdy Kazinform agenttiginiń menshikti tilshisi.

Buǵan deıin Qyrǵyz Respýblıkasynyń Ulttyq qaýipsizdik memlekettik komıteti basqa elderdegi qarýly qaqtyǵystarǵa paıdalaný úshin jaldamaly jasaqshy tartqan degen aıyppen tórt adamdy, onyń ishinde Oshtaǵy Orys úıiniń qyzmetkeri Natalıa Sekerına men Osh ákimdigi baspasóz qyzmetiniń ókilin ustaǵan bolatyn.

— 25 sáýirde Ulttyq qaýipsizdik memlekettik komıteti Bas tergeý basqarmasy Іshki ister departamenti tergeýshisiniń aıyptalýshy S.N.V. men S.V.T.-ǵa qatysty bultartpaý sharasyn úıqamaqqa ózgertý týraly ótinishhaty qanaǵattandyryldy. Pervomaıskıı aýdandyq sotynyń qaýlysymen atalǵan tulǵalar úıqamaqqa shyǵaryldy,- delingen sot habarlamasynda.

Bishkektiń Pervomaıskıı aýdandyq sotynyń málimetinshe, kúdiktiler QK QK-niń 416-babynyń 1-bóligi boıynsha «jaldamalylardy basqa memleketterdiń qarýly qaqtyǵystarynda nemese memlekettik bılikti qulatýǵa nemese aýmaqtyq tutastyqty buzýǵa baǵyttalǵan zorlyq-zombylyq áreketterinde paıdalaný úshin jaldaý, qarjylandyrý, materıaldyq qamtamasyz etý, oqytý, sondaı-aq jaldamalylardy áskerı qaqtyǵystarda nemese is-áreketterge paıdalaný» boıynsha qylmys jasady dep aıyptaldy.

Buǵan deıin elde jappaı tártipsizdikterdi daıyndaý men uıymdastyrýǵa qatysqan sybaılastar ustalǵany habarlanǵan bolatyn.

Osyǵan deıin Qyrǵyzstanda jappaı tártipsizdik uıymdastyrýǵa daıyndalyp jatqan top ustalǵany týraly jazdyq.