Qyrǵyzstanda adam ar-namysyna tıgeni úshin salynatyn aıyppul somasy azaıdy
BІShKEK. KAZINFORM — Parlamenttiń Quqyqtyq tártip, qylmysqa qarsy kúres jáne sybaılas jemqorlyqqa qarsy is-qımyl komıteti ekinshi oqylymda BAQ jáne ınternette qorlaý nemese jala jabý úshin aıyppul salý týraly zań jobasyn maquldady, dep habarlaıdy Kazinform menshikti tilshisi.
Buqaralyq aqparat quraldarynda jáne ınternet saıttaryndaǵy qorlaý nemese jala jabý úshin zań jobasynda bastapqyda jeke tulǵalarǵa 1000 eseptik kórsetkish (100 myń som), zańdy tulǵalarǵa — 2000 eseptik kórsetkish (200 myń som) mólsherinde aıyppul salý qarastyrylǵan.
Uzaq talqylaýdan keıin jeke tulǵalarǵa salynatyn aıyppul 20 myń somǵa, zańdy tulǵalarǵa — 65 myń somǵa deıin tómendetildi.
Engizilgen usynystarǵa sáıkes, Іshki ister mınıstrligi quqyq buzýshylyqtar týraly aryzdardy qarap, odan ári sotqa jiberedi.
Buǵan deıin Qyrǵyzstanda buqaralyq aqparat quraldary men ınternette adamǵa jala japqany jáne ar-namysyna tıgeni úshin jazany qatańdatý usynylǵany týraly jazǵan bolatynbyz.
