Qyrǵyzstanda Abaı Qunanbaıulynyń qurmetine kóshe ataýy berilip, eskertkish ornatylady
ASTANA. KAZINFORM — Qyrǵyzstannyń Osh qalasynda qazaqtyń uly aqyny Abaı Qunanbaıulynyń qurmetine kóshe ataýy berilip, eskertkish qoıylady, dep habarlaıdy Kabar.
Qalalyq ákimdiktiń málimetinshe, Osh qalasynyń basshysy Jenıshbek Toktorbaev Qazaqstannyń Osh qalasyndaǵy bas konsýly Muhtar Karıbaev jáne Ózbekstannyń bas konsýly Zafarbek Ahmedovpen birge Volgograd jáne K. Tımırıazev kóshelerin aralap kórdi.
Atalǵan kóshelerdiń birine qazaqtyń uly aqyny Abaı Qunanbaıulynyń esimi beriledi, sondaı-aq sol kóshelerdiń birinde aqynǵa eskertkish ornatylady.
Qazirgi ýaqytta bul kóshelerde júrgizilip jatqan kúrdeli jóndeý jumystary aıaqtalýǵa jaqyn. Olardyń jalpy uzyndyǵy — 3 shaqyrym 800 metr.
Aldaǵy bir aı ishinde osy kóshelerdiń birinde Abaı eskertkishi ornatylyp, shaǵyn saıabaq abattandyrylmaq.
Kazinform tilshisi Abaı oblysynda ótken «Abaı kúninen» fotoreportaj usynǵan edi.
Budan buryn Abaı oblysynyń ákimi Berik Ýálı Abaı aýdany Qaraýyl aýylynda ótken «Abaı kúni» merekesinde «Abaı-Shákárim» kesenesi aýmaǵynda «Etno aýyl Jıdebaı» kesheni salynatyndyǵyn jetkizdi.