Qyrǵyzstanda 6 myń metrden astam bıikke shyǵatyn alpınıster ruqsat alýǵa mindetteledi

ASTANA.KAZINFORM — Qyrǵyzstan alpınısterdi bıiktigi alty myń metrden asatyn taý shyńdaryna shyǵýǵa aqyly ruqsat alýǵa mindettedi, dep habarlaıdy Kazinform agenttiginiń tilshisi. 

Tıisti zań jobasy Qyrǵyz Respýblıkasynyń Jogorký Keneshinde ázirlenip, qoǵamdyq talqylaýǵa usynyldy.

Elde alpınızmniń tanymaldyǵy artyp keledi. Al alpınızm salasynda qaýipsizdik, ekologııalyq jaýapkershilik jáne ruqsat alý máselelerinde quqyqtyq vakýým týdyratyn zańnama áli joq.

Ruqsat alý mynalarǵa múmkindik beredi:

* memlekettik organdar alpınısterdiń júrý baǵyttaryn qadaǵalaý jáne qajet bolǵan jaǵdaıda qar kóshkini qaýpimen, aýa raıynyń kúrt ózgerýimen jáne kúrdeli logıstıkamen baılanysty tótenshe jaǵdaılarǵa jedel den qoıý;
* antropogendik júktemeni shekteý, alpınıster aǵynyn baqylaý jáne ekologııalyq turaqty alpınızm prıntsıpterin júzege asyrý;
* ruqsat berýden túsken qarajatty ınfraqurylymdy damytýǵa (taý lagerleri, taý joldary, baılanys júıeleri), avarııalyq-qutqarý jumystaryn qarjylandyrýǵa jáne tabıǵı aýmaqtardy qorǵaýǵa baǵyttaý.

Alpınısterge ruqsat berý men tirkeýdiń ashyq tetikteri taýǵa shyǵýshylardyń senim deńgeıi men quqyqtyq qorǵalýyn arttyratyny atalyp ótti.

Taý shyńdaryna ekspedıtsııalar júrgizý kezinde alpınısterdiń medıtsınalyq kómek pen evakýatsııany qamtıtyn qoldanystaǵy saqtandyrýy bolýy kerek. Sondaı-aq, barlyq qaldyqtardy arnaıy kózdelgen oryndardaǵy jeke qaptarǵa tastaý mindetteledi. Qujatqa sáıkes, permıt alýdy qajet etetin taýlarǵa órmeleý tek sertıfıkattalǵan gıdtiń kómegimen múmkin bolady.

Tólem tártibi, mólsheri men ruqsat qajet aýmaqtardyń tizbesin Qyrǵyz Respýblıkasynyń Mınıstrler Kabıneti belgileıdi. Buǵan deıin sarapshylar Qyrǵyzstan taýlaryndaǵy reseılik alpınısti qutqarý múmkin emes ekenin aıtqan.