Qyrǵyzstanda 2500 ga aýmaqta orman qalpyna keltiriledi

ASTANA. KAZINFORM — Bishkek qalasynda «Shóp pen jaıylym qaýymdastyqtarynyń aımaqtyq turaqtylyǵy — ADAPT» jobasy aıasynda ormandardy qalpyna keltirýge arnalǵan 81 mıllıon somnan astam granttyq kelisimsharttarǵa qol qoıý rásimi ótti. 

Bul týraly Kabar Qyrǵyz Respýblıkasy Aýyl sharýashylyǵy mınıstrligine silteme jasap habarlady.

Sharaǵa Qyrǵyz Respýblıkasynyń Sý resýrstary, aýyl sharýashylyǵy jáne óńdeý ónerkásibi mınıstrliginiń orynbasary M. Dúısheev, Qyrǵyz Respýblıkasynyń Tótenshe jaǵdaılar mınıstrligi janyndaǵy Orman qyzmetiniń dırektorynyń orynbasary T. Sadyrov jáne basqa da mamandar qatysty.

Atalǵan bastama Aýyl sharýashylyǵy mınıstrligi tarapynan júzege asyrylyp, orman resýrstaryn turaqty basqarýǵa, degradatsııaǵa ushyraǵan aýmaqtardy qalpyna keltirýge jáne jergilikti qaýymdastyqtardyń ómir súrý jaǵdaıyn jaqsartýǵa baǵyttalǵan.

Joba aıasynda 2500 gektar aýmaqta ormandy qalpyna keltirý, jańa orman alqaptaryn qurý jáne tabıǵı qalpyna keltirý protsesterin qoldaý boıynsha aýqymdy jumystar júrgizilýi josparlanyp otyr.

Bul is-sharalar Qyrǵyz Respýblıkasynyń Prezıdenti Sadyr Japarovtyń usynǵan «Jashyl muras» ulttyq bastamasyna sáıkes keledi. Bul naýqan aıasynda elde jasyl aımaqtardy keńeıtý, ormandardy qalpyna keltirý jáne ekologııalyq turaqtylyqty qamtamasyz etý boıynsha aýqymdy sharalar júzege asyrylyp jatyr.

Qol qoıylǵan kelisimderdiń oryndalýy orman resýrstaryn tıimdi jáne turaqty basqarýǵa, degradatsııalanǵan jerlerdi qalpyna keltirýge, bıoalýantúrlilikti saqtaýǵa jáne óńirlerdegi áleýmettik-ekonomıkalyq jaǵdaıdy jaqsartýǵa yqpal etedi.

Budan buryn 2026 jylǵy 20 naýryzdan bastap Qyrǵyz Respýblıkasynyń aýmaǵynda aýyl sharýashylyǵy sanaǵy júrgizile bastaǵanyn jazǵan edik.