Qyrǵyzstanda 2027 jyldan bastap tsıfrlyq som engiziledi

ASTANA. KAZINFORM — Qyrǵyzstanda tsıfrlyq somdy engizý 2027 jylǵy 1 qańtarǵa josparlanǵan. Bul týraly 24 aqpanda ótken baspasóz konferentsııasynda Qyrǵyz Respýblıkasynyń Ulttyq bankiniń tóraǵa orynbasary Azat Kozýbekov habarlady, dep jazady Kabar.

Onyń aıtýynsha, tıisti zań kórsetilgen kúnnen bastap kúshine enedi jáne sol ýaqytta tsıfrlyq som resmı aınalymǵa engiziledi.

Qazirgi tańda Ulttyq bank jobany júzege asyrý boıynsha seriktesterimen birlesip jumysyn jalǵastyryp jatyr.

Tsıfrlyq som — Ulttyq bank shyǵaratyn ulttyq valıýtanyń tsıfrlyq nusqasy. Ol zańdy tólem quraly sanalady jáne bir tsıfrlyq som bir qolma-qol somǵa teń bolady. Tsıfrlyq valıýta retteýshiniń kepildikterimen qamtamasyz etilgendikten, qarajatty qalpyna keltirý múmkindigi qarastyrylǵan.

Sonymen qatar, Kozýbekov bıyl pılottyq jobanyń iske asýy týraly tolyq aqparat beriletinin aıtty. Bul joba retteýshi úshin basty basym baǵyttardyń biri sanalady.

Budan buryn Qyrǵyzstan Ulttyq banki negizgi mólsherlemeni 12%-ǵa deıin kótergenin jazǵan bolatynbyz.