Qyrǵyzstanda 15 jastaǵy qyzdy seksýaldyq quldyqta ustaǵan
ASTANA. KAZINFORM – Qyrǵyzstannyń Osh qalasynda 15 jastaǵy qyz bir aıdan astam ýaqyt seksýaldyq quldyqta bolǵan, dep habarlaıdy Qyrǵyzstan Respýblıkasy ombýdsmeniniń baspasóz qyzmeti.
Jasóspirimniń ókili Jahangır Saıfýllaev Qyrǵyzstannyń aqıqatshysy (ombýdsmeni) Jámıla Jamanbaevaǵa habarlasty. Ol zardap shekken qyz bala baǵynbaǵany úshin jazalanǵanyn jáne barlyǵy beınege túsirilip, qazir jelidegi messendjerlerde taralyp jatqanyn aıtty.
«Beınejazbada qyzdyń zorlyq-zombylyq kórgeni týraly sumdyq kadrlar kórsetilgen. Olar ony uryp-soǵyp, zorlyq-zombylyqpen qorqytyp, jalańash sheshindirip, qasyn pyshaqpen qyryp tastaǵan. Jasóspirim ıntımdik qyzmet kórsetý úshin ártúrli er adamdarǵa «satylǵan». Ol tozaqtyń barlyq sheńberinen ótti», - dedi ol.
J.Jamanbaeva quqyq qorǵaý organdarynyń basshylaryn zorlyq-zombylyq kórgen 15 jastaǵy qyzdyń quqyǵyn qamtamasyz etý úshin shuǵyl sharalar qabyldaýǵa shaqyrady. Qazir oǵan zańgerlik kómek kórsetilip jatyr. Zorlyq-zombylyq qurbany uzaq merzimdi ońaltýdy qajet etedi. Ol qylmysqa qatysqandardyń barlyǵy bostandyqta júrgendikten óz ómiri úshin qorqady. Aqıqatshy quqyq qorǵaý organdarynan adam saýdasynyń qurbandarynyń qaýipsizdigin qamtamasyz etý úshin shara qabyldaýdy talap etedi.
«Balalardy saýdalaǵandar zań sheńberinde barynsha jazalanýy tıis. Mundaı ashyq qylmysqa qatysy bardyń barlyǵy tabylyp, jazalanýy kerek», - dep talap etti J.Jamanbaeva.
Eske sala ketsek, dál osyndaı jaǵdaı Qyzylordada da bolǵan edi. Mektep oqýshylary synyptasyn seksýaldyq quldyqta ustady degen kúdikke ilindi. 16 jastaǵy qyzdy bir top jasóspirim kúshtep ustap alyp, esirtki berip, jezókshelikpen aınalysýǵa májbúrlegen. Tergeý amaldary júrgizilip jatyr. Keıin Qyzylorda oblysynyń ákimi jaýapty organdardyń jumysyn synǵa alyp, birqatar sheneýnikti qyzmetinen bosatty. Bala quqyqtary jónindegi ýákil Dınara Zákıeva oqýshy qyzǵa qandaı kómek kórsetilgenin aıtty.
Jábirlenýshiniń úıi táýlik boıy kúzetilip jatyr. QR Іshki ister mınıstrligi 8 kúdikti qamaýǵa alynǵanyn habarlady.
