Qyrǵyzstanda 12 bala táttiden ýlandy

BІShKEK. KAZINFORM – Qyrǵyzstannyń Shý aýdany Iskra aýylynda 27 qarashada mektep oqýshylary kámpıt pen tátti spreıden ýlanǵan, dep habarlaıdy Kazinform menshikti tilshisi.

Shý oblysy ishki ister basqarmasynyń málimetinshe, 27 qarashada Toqmaq qalalyq aýrýhanasyna Iskra aýylynyń kámeletke tolmaǵan 12 turǵyny (2012, 2009, 2008 j.) «tamaqtan ýlaný» dıagnozymen túsken. Zardap shekkenderge medıtsınalyq kómek kórsetilip, barlyǵy úılerine jiberildi. Atalǵan fakti tirkelip, tergeýge deıingi tekserý amaldary bastaldy.

Anyqtalǵandaı, 12 jastaǵy 7 synyp oqýshysy Iskra aýylyndaǵy qoqys polıgonynan bir paket «BEN 10» kámpıtteri men bótelkedegi tátti spreıdi taýyp alyp, mekteptegi synyptastaryna bergen. Artynsha balalar táttilerden ýlanǵan. Ónimder tárkilenip, sot-medıtsınalyq saraptamalar taǵaıyndaldy. Qazirgi tańda mektep oqýshylarynyń jaǵdaıy turaqty dep baǵalanyp otyr.

Eske sala ketsek, 2023 jyldyń naýryz aıynda Qyrǵyzstannyń Osh oblysynyń Qara-Sýý aýdanynda 43 mektep oqýshysy belgisiz zattan ýlanǵan bolatyn. Aldyn ala málimet boıynsha, oqýshylardyń biri átir seýip, sodan keıin oqýshylar aýyryp qalǵan.

Osyǵan deıin Qyrǵyzstanda adamnyń ar-namysyna tıgeni úshin salynatyn aıyppul somasy azaıǵany týraly jazdyq.