Qyrǵyzstanda 1 qazannan bastap zeınetaqy mólsheri ósedi
ASTANA. KAZINFORM — Qyrǵyzstan Mınıstrler kabıneti «Memlekettik zeınetaqy áleýmettik saqtandyrýy týraly» zańǵa sáıkes taǵaıyndalǵan zeınetaqylardy 2025 jylǵy 1 qazannan bastap ındeksteý týraly qaýly qabyldady, dep jazady Kabar.
Qujatqa sáıkes, 2025 jyldyń 1 qazanynan bastap zeınetaqynyń saqtandyrý bóliginiń mólsheri 50 000 somnan aspaıtyn zeınetaqylar úshin ındeksteý koeffıtsıenti 1,10 bolyp belgilendi.
Sonymen qatar, «Memlekettik zeınetaqy áleýmettik saqtandyrýy týraly» zańǵa sáıkes 2025 jylǵy 1 qazannan keıin taǵaıyndalatyn zeınetaqynyń jalpy mólsheri (qosymsha tólemderdi eskere otyryp) 7 100 (jeti myń bir júz) somnan kem bolmaýy tıis. Bul talap atalmysh zańda kózdelgen keıbir erekshelikten basqa jaǵdaılarǵa qoldanylady.
Áleýmettik qorǵaý qory 2025 jyldyń 1 qazanynan bastap osy zańǵa sáıkes 2025 jylǵy 1 qazanǵa deıin taǵaıyndalǵan zeınetaqylardyń saqtandyrý bóligin 1,10 koeffıtsıentimen ındeksteýdi qamtamasyz etýi tıis.
Sonymen qatar, saqtandyrý bóligi 50 000 somnan asatyn zeınetaqylar úshin ósim keminde 600 som, eń kóbi 5 000 som bolýy qajet.
Qor sondaı-aq zeınetaqynyń saqtandyrý bóligin ýaqytyly qaıta eseptep, jańartylǵan mólsherde tóleýdi qamtamasyz etýge mindetti.
Budan buryn Qyrǵyzstanda ortasha aılyq jalaqy 42 myń somnan asqanyn jazǵanbyz.