Qyrǵyzstanda 1 aǵash keskender 5 aǵash otyrǵyzýǵa mindettelmek
ASTANA. KAZINFORM — Qyrǵyzstan jasyl keńistikterdi qorǵaý erejelerin kúsheıtýde, dep habarlaıdy Kazinform agenttiginiń Bishkektegi menshikti tilshisi.
Tıisti zań jobasyn Qyrǵyzstan Jogorký Keneshiniń Sot-quqyq máseleleri, quqyq tártibi, qylmyspen kúres jáne sybaılas jemqorlyqqa qarsy is-qımyl komıteti birinshi oqylymda qabyldady.
Qujatqa sáıkes, «birge bes» ustanymy boıynsha kógaldandyrý talaby engiziledi. Bul rette kóshetterdi ekken adam jersinýin qadaǵalaıdy, úsh jyl boıy kútedi. Jergilikti bılik organdarynyń usynýymen, kóshetti balama oryndarǵa otyrǵyzý múmkindigi qarastyrylǵan.
Zań jobasynda eldi mekenderdegi jasyl keńistikterge ekologııalyq qaýipsizdikti jáne halyqtyń sanıtarlyq-gıgıenalyq ál-aýqatyn qamtamasyz etetin mańyzdy ınfraqurylym retinde arnaıy quqyqtyq mártebe belgileý usynylady.
Bul sharalar aǵashtardyń jappaı kesilýin jáne qalalardaǵy demalys aımaqtarynyń retsiz damýyn toqtatýǵa baǵyttalǵan.
Buǵan deıin Qyrǵyzstanda zańsyz qoqys úıindilerine aıyppul salý usynylǵan.
