Qyrǵyzstan janar-jaǵarmaı baǵasyn ustap turý úshin 1 mıllıard som sýbsıdııa bóldi
ASTANA.KAZINFORM - Memleket elge janar-jaǵarmaı materıaldaryn jetkizýdi sýbsıdııalaýdy jalǵastyryp jatyr, dep habarlaıdy agenttiktiń Bishkektegi menshikti tilshisi.
Qyrǵyzstan Mınıstrler Kabınetiniń habarlaýynsha, Qyrǵyzstanǵa munaı ónimderin ımporttaıtyn kompanııalarǵa janar-jaǵarmaı materıaldarynyń naqty quny men olardyń bólshek saýda baǵasy arasyndaǵy aıyrmashylyqty óteý úshin 956 139 000 som bólindi. Munaı óniminiń túrine baılanysty aıyrmashylyq lıtrine shamamen 20-dan 40 somǵa deıin.
- Benzın satýǵa sýbsıdııa berý - halyq pen ekonomıka salalaryn memlekettik qoldaýdyń tıimdi sharasy. Eldegi janar-jaǵarmaı materıaldarynyń naqty quny men bólshek saýda baǵalary arasyndaǵy aıyrmashylyqty sýbsıdııalaý jumystary jalǵasady, - dedi Mınıstrler Kabınetiniń tóraǵasy Ádilbek Qasymálıev.
Úkimet memlekettik sýbsıdııalar ýaqytyly beriletindikten, aımaqtardaǵy barlyq kompanııalyq janar-jaǵarmaı quıý stantsııalary eshqandaı shekteýsiz tolyq jumys isteýi kerek ekenin atap ótti.
Otyrys qorytyndysy boıynsha jaýapty organdarǵa:
* elge munaı ónimderin úzdiksiz jetkizýdi qamtamasyz etý;
* jaǵdaıdy baqylaýdy kúsheıtý;
* munaı ónimderi sektorynda jumys isteıtin kompanııalarmen tyǵyz yntymaqtastyq ornatý;
* jańa ımporttyq kelisimder jasaý;
* jańa ımporttyq tetikterdi qarastyrý;
* memlekettik shekaradaǵy logıstıkalyq máselelerdi sheshý;
* munaı óńdeý zaýyttaryn jańǵyrtýdy belgilengen merzimde aıaqtaý;
* qajetti sharalardy ýaqytyly qabyldaý.
Aıta keteıik, osy jyldyń mamyr aıynda Qyrǵyzstan resmı túrde janar-jaǵarmaı ımporttaýshylaryna ýaqytsha sýbsıdııalar men otyn baǵasyn memlekettik retteýdi engizdi.
Sondaı-aq Qyrǵyzstanda janar-jaǵarmaıǵa salynatyn salyqty ýaqytsha tómendetý usynyldy.
